ആലുവ : പെണ്കുട്ടികളുടെ ഹോസ്റ്റലിലെ അനാവശ്യനിയന്ത്രണങ്ങള് പിന്വലിക്കണമെന്നാവശ്യപ്പെട്ട് വിദ്യാര്ത്ഥികളുടെ സമരം. ആലുവ യുസി കോളേജിലാണ് അനിശ്ചിത കാലം സമരം തുടങ്ങിയത്. വൈകീട്ട് 6.30 ന് പെണ്കുട്ടികള് ഹോസ്റ്റലില് തിരികെ കയറിയിരിക്കണമെന്നാണ് ആലുവ യുസി കോളേജ് ഹോസ്റ്റലിലെ നിയമം. അത് ഒമ്പതരയാക്കണമെന്നാണ് വിദ്യാര്ത്ഥികളുടെ ആവശ്യം.
കഴിഞ്ഞ മാസം 22 ന് ഇതേ ആവശ്യവുമായി വിദ്യാര്ത്ഥികള് അഞ്ച് മണിക്കൂര് കോളേജ് കവാടം ഉപരോധിച്ചിരുന്നു. തുടര്ന്ന് ജനുവരി മൂന്നിന് കോളേജ് മാനേജ്മെന്റ് പ്രതിനിധികളുമായി ചര്ച്ചയും നടന്നു. ആവശ്യം പരിഗണിക്കാമെന്ന് അന്ന് കിട്ടിയ ഉറപ്പ് പാഴായതോടെയാണിപ്പോള് വീണ്ടും സമരത്തിനിറങ്ങിയത്. ഹോസ്റ്റല് കര്ഫ്യൂ സമയം രാത്രി ഒമ്പതര വരെയാക്കാന് 2019 ല് ഹൈക്കോടതി ഉത്തരവ് വന്നിരുന്നു. അന്തിമ തീരുമാനം എടുക്കേണ്ടത് പ്രിന്സിപ്പളാണെന്നും ഉത്തരവിലുണ്ട്.
