ആലപ്പുഴ: തിരുവിതാംകൂര് ദേവസ്വം ബോര്ഡിന്റെ കൊമ്പന് അമ്പലപ്പുഴ വിജയകൃഷ്ണന് ചരിഞ്ഞത് മതിയായ ചികിത്സ കിട്ടാഞ്ഞിട്ടാണെന്ന് ആരോപിച്ച് നാട്ടുകാരും ആനപ്രേമികളും രംഗത്തെത്തി. കുറ്റക്കാരായ ഉദ്യോഗസ്ഥര്ക്കെതിരെ നടപടിയെടുക്കും വരെ ആനയുടെ സംസ്കാര ചടങ്ങുകള് നടത്താന് അനുവദിക്കില്ലെന്ന നിലപാടുമായി ആളുകള് അമ്പലപ്പുഴ ക്ഷേത്ര പരിസരത്ത് തടിച്ചുകൂടി. ഇന്ന് ഉച്ചയോടെയാണ് ഗജരാജന് അമ്പലപ്പുഴ വിജയകൃഷ്ണന് ചരിഞ്ഞത്.
ആനയ്ക്ക് ചികിത്സ ഉറപ്പാക്കുന്നതില് വീഴ്ച വരുത്തിയ ഉദ്യോഗസ്ഥര്ക്കെതിരെ നടപടി ഉണ്ടാകുംവരെ പ്രതിഷേധം തുടരാനാണ് നാട്ടുകാരുടെ തീരുമാനം. സ്ഥലത്ത് വന് പോലീസ് സന്നാഹവും ക്യാമ്പ് ചെയ്യുന്നുണ്ട്.
കാലില് ആഴത്തിലുള്ള മുറിവ് അടക്കം അസുഖങ്ങള് ഉണ്ടായിരുന്ന വിജയകൃഷ്ണനെ ദേവസ്വം ബോര്ഡിന് കീഴിലെ വിവിധ ക്ഷേത്രങ്ങളില് എഴുന്നള്ളിപ്പിന് കൊണ്ടുപോയി. ചികിത്സ ഉറപ്പാക്കണമെന്ന് ദേവസ്വം ഉദ്യോഗസ്ഥരോട് ഹൈന്ദവ സംഘടനകളും ആനപ്രേമി കൂട്ടായ്മയും പലതവണ ആവശ്യപ്പെട്ടിരുന്നു. എന്നാല് ആനയ്ക്ക് പാപ്പാന്റെ ക്രൂരപീഢനം അടക്കം ഏറ്റുവാങ്ങേണ്ടി വന്നെന്നാണ് പരാതി.
