മലപ്പുറം : മഞ്ചേരി ഗവ.മെഡിക്കല് കോളേജില് നിന്നും മാലിന്യം കൊണ്ടുപോകുന്നത് ആംബുലന്സില്. രോഗികള്ക്ക് പോലും അവശ്യ സമയത്ത് ആംബുലന്സ് കിട്ടാതിരിക്കുമ്പോഴാണ് അധികൃതരുടെ ഈ തെറ്റായ നടപടി. കഴിഞ്ഞ ദിവസം ഉച്ചക്കുശേഷം ആംബുലന്സില് ആശുപത്രി മാലിന്യം എത്തിച്ചത് ഡി.വൈ.എഫ്.ഐ പ്രവര്ത്തകര് ചോദ്യം ചെയ്തു.
ആശുപത്രിയില് രോഗികള്ക്കുള്ള പൊതിച്ചോര് വിതരണം നടത്തുന്നതിന് ഇടയിലാണ് ഡി.വൈ.എഫ്.ഐ പ്രവര്ത്തകര് ഈ കാഴ്ച കണ്ടത്. ആശുപത്രിയിലെ മാലിന്യം കൊണ്ടുപോകാന് രണ്ട് സ്വകാര്യ ഏജന്സികളാണ് കരാര് എടുത്തിട്ടുള്ളത്. അത്യാഹിത വിഭാഗത്തിന് പരിസരത്തെ മാലിന്യ സൂക്ഷിപ്പുകേന്ദ്രത്തില് നിന്നാണ് ഇവര് മാലിന്യം എടുക്കുക. ഇവിടേക്ക് മാലിന്യം എത്തിക്കേണ്ടത് ആശുപത്രി അധികൃതരുടെ ചുമതലയാണ്.
എല്ലാ ബ്ലോക്കുകളിലെയും മാലിന്യം കവറുകളില് നിറച്ച് ആംബുലന്സില് കയറ്റിയാണ് സൂക്ഷിപ്പു കേന്ദ്രത്തിലേക്ക് എത്തിക്കുന്നത്. ആംബുലന്സിനകത്ത് രോഗികളെ കിടത്തുന്ന സ്ട്രെച്ചറില് പോലും മാലിന്യം വെക്കുന്ന അവസ്ഥയാണുള്ളത്. കൂടാതെ അത്യാഹിത വിഭാഗത്തിലെ വീല്ചെയറിലും ട്രോളിയിലും അടക്കം മാലിന്യങ്ങള് കൊണ്ടുപോകുന്നതായി രോഗികള് പറഞ്ഞു. എന്നാല് മാലിന്യം കൊണ്ടുപോകാന് മറ്റു വാഹനങ്ങളില്ലെന്നാണ് ആശുപത്രി അധികൃതരുടെ വാദം.
