പറ്റ്ന: രാമനവമി ദിനത്തിലെ സംഘര്ഷത്തെ തുടര്ന്ന് ബിഹാറിലെ സസാരാമില് നടക്കാനിരുന്ന കേന്ദ്ര ആഭ്യന്തരമന്ത്രി അമിത് ഷായുടെ പരിപാടി റദ്ദാക്കി. കേന്ദ്രസേനയെ വിന്യസിക്കാമെന്ന് അറിയിച്ചെങ്കിലും സംസ്ഥാന സര്ക്കാര് സഹകരിച്ചില്ലെന്ന് ബിജെപി കുറ്റപ്പെടുത്തി. ബിഹാറിലെ സംഘര്ഷം ഉണ്ടായ മേഖലകളില് എല്ലാം നിരോധനാജ്ഞ തുടരുകയാണ്. ബംഗാളില് 38 പേരെയാണ് സംഘര്ഷവുമായി ബന്ധപ്പെട്ട് പോലീസ് അറസ്റ്റ് ചെയ്ത്. ബിഹാറിലെ നളന്ദയില് 27 പേരെയും സസാരാമില് 18 പേരെയും സംഘര്ഷത്തെ തുടര്ന്ന് അറസ്റ്റ് ചെയ്തിട്ടുണ്ട്.
ജില്ലാ ഭരണകൂടം വേദിയിലും സസാരം നഗരത്തിലാകെ 144 സെക്ഷന് ഏര്പ്പെടുത്തിയിട്ടുണ്ടെന്നും അവിടെ ഒരു പരിപാടി സംഘടിപ്പിക്കാന് എങ്ങനെ സാധിക്കുമെന്നും ബിഹാര് ബിജെപി അധ്യക്ഷന് സാമ്രാട്ട് ചൗധരി ചോദിച്ചു. നമ്മുടെ ആളുകള്ക്ക് സുരക്ഷ ഒരുക്കുന്നതില് ബീഹാര് സര്ക്കാര് പരാജയപ്പെട്ടത് അങ്ങേയറ്റം നിര്ഭാഗ്യകരമാണ്. ഞങ്ങളുടെ അനുഭാവികളെ ഒരു വിഭാഗം ആളുകള് ആക്രമിക്കുകയാണെന്നും ചൗധരി പറഞ്ഞു.
