വെണ്മണി : ലക്ഷങ്ങള് കുടിയൊഴിപ്പിക്കപ്പെടുന്നതും വന്പാരിസ്ഥിതിക ദുരന്തങ്ങള് സൃഷ്ടിക്കുന്നതും കേരളത്തെ കടക്കെണിയില് ആക്കുന്നതുമായ കെറെയില് സില്വര് ലൈന് പദ്ധതി ഉപേക്ഷിക്കണമെന്ന് ആവശ്യപ്പെട്ടു കൊണ്ട് കെറെയില് സില്വര് ലൈന് വിരുദ്ധ ജനകീയ സമിതിയുടെ നേതൃത്വത്തില് പദ്ധതി ബാധിത പ്രദേശമായ പുന്തലയിലെ ജനങ്ങള് വെണ്മണി പഞ്ചായത്ത് ആഫീസിലേക്ക് പ്രതിഷേധ മാര്ച്ചും ധര്ണ്ണയും നടത്തി.
ജനകീയ സമിതി ആലപ്പുഴ ജില്ലാ വൈസ് പ്രസിഡന്റ് എൻ.ആർ ശ്രീധരന് പിള്ള അദ്ധ്യക്ഷത വഹിച്ച പ്രതിഷേധ യോഗം മുന് പഞ്ചായത്ത് പ്രസിഡന്റ് ലെജുകുമാര് ഉദ്ഘാടനം ചെയ്തു. അഖിലേന്ത്യാ മഹിളാ സാംസ്കാരിക സംഘടന സംസ്ഥാന പ്രസിഡന്റ് മുഖ്യപ്രഭാഷണം നടത്തി. പഞ്ചായത്ത് മെമ്പറുമാരായ മറിയാമ്മ ചെറിയാന്, അനിതാ മോഹന്, സൂര്യ, മനോജ് മുരളി, ബിന്ദു, ജനകീയ സമിതി ജില്ലാ ജനറല് കണ്വീനര് കെ.ആർ ഓമനക്കുട്ടന്, കണ്വീനറുമാരായ മധു ചെങ്ങന്നൂര്, ടി.കോശി, ഡി.സി.സി മെമ്പര് ശ്രീകുമാര് കോയിപ്പുറം എന്നിവര് പ്രസംഗിച്ചു. സുരേഷ് കുമാര് സ്വാഗതവും കെ.ജി സുശീലന് കൃതജ്ഞതയും പറഞ്ഞു.