കൊച്ചി : അഭിമന്യു വധക്കേസിലെ സുപ്രധാന രേഖകള് വിചാരണ കോടതിയില് നിന്നും കാണാതായ സംഭവത്തില് ഡയറക്ടര് ജനറല് ഒഫ് പ്രോസിക്യൂഷന് (ഡിജിപി) അന്വേഷണവും ആഭ്യന്തര അന്വേഷണവും തുടങ്ങി. രേഖകള് നഷ്ടമായതില് വന്ന വീഴ്ച ആര്ക്കാണെന്ന തരത്തിലുള്ള അന്വേഷണമാകും നടക്കുക. അതിനിടെ കാണാതായ രേഖകള് പുന:സംഘടിപ്പിക്കുന്നതിന്റെ ഭാഗമായി കൈവശമുള്ള പകര്പ്പുകള് വിചാരണ കോടതിക്ക് കൈമാറുന്ന നടപടികളും ആരംഭിച്ചിട്ടുണ്ട്. കേസ് ഈ മാസം 18ന് പരിഗണിക്കുമ്പോള് രേഖകള് കൈമാറും.
അതേസമയം, രേഖകള് കാണാതായത് വിചാരണയെ ബാധിക്കില്ലെന്നാണ് നിയമവിദഗ്ധര് പറയുന്നത്. കേസില് വിചാരണ ആരംഭിക്കാനിരിക്കെയാണ് കഴിഞ്ഞ ഡിസംബറില് രേഖകള് നഷ്ടമായത്. എറണാകുളം സെന്ട്രല് പോലീസ് കോടതിയില് സമര്പ്പിച്ച രേഖകളാണിവ. കേസിലെ കുറ്റപത്രം ഉള്പ്പെടെയുള്ള രേഖകള് നഷ്ടമായ വിവരം ഡിസംബറില് സെഷന്സ്കോടതി ജഡ്ജി ഹൈക്കോടതിയെ അറിയിച്ചിരുന്നു. രേഖകള് എത്രയും വേഗം കണ്ടെത്തണമെന്ന നിര്ദേശമാണ് ഹൈക്കോടതി നല്കിയത്.
