അബുദാബി : സാംസ്കാരിക വിനോദസഞ്ചാര വകുപ്പിനുകീഴിലെ (ഡി.സി.ടി. അബുദാബി) അൽഐൻ ഹിലി ആർക്കിയോളജിക്കൽ പാർക്ക് സന്ദർശിക്കാൻ പൊതുജനങ്ങൾക്ക് അവസരം. ഈ മാസം 20-നാണ് യുനസ്കോയുടെ ലോക പൈതൃകപട്ടികയിൽ ഇടംപിടിച്ച ആർക്കിയോളജിക്കൽ പാർക്ക് സന്ദർശിക്കാൻ ‘ഓപ്പൺ ഡേ’യായി അധികൃതർ പ്രഖ്യാപിച്ചത്. ഉത്ഖനനത്തിലൂടെ കണ്ടെത്തിയ 3000 വർഷം മുൻപത്തെ വസ്തുക്കളടക്കം ഹിലി ആർക്കിയോളജിക്കൽ പാർക്കിൽ പ്രദർശിപ്പിച്ചിട്ടുണ്ട്.
പ്രാചീനമനുഷ്യർ ഉപയോഗിച്ചതെന്ന് കരുതപ്പെടുന്ന മൺപാത്രങ്ങൾ, അലങ്കരിച്ച ജാറുകൾ, വെങ്കല ഉത്പന്നങ്ങൾ തുടങ്ങിയവയും ഹിലി ആർക്കിയോളജിക്കൽ പാർക്കിലുണ്ട്. സന്ദർശകർക്ക് പുരാവസ്തു ഗവേഷകരുമായി സംവദിക്കാനും അവസരമുണ്ടായിരിക്കുമെന്നും അധികൃതർ അറിയിച്ചിട്ടുണ്ട്.
