കോന്നി : അടവിയിലും ആനക്കൂട്ടിലും ജന തിരക്ക് വർധിച്ചു. ഉത്രാടം വരെയുള്ള ദിവസങ്ങളിൽ കോന്നി ഇക്കോ ടൂറിസം സെന്ററിൽ ഓണ തിരക്ക് കുറവായിരുന്നു. എന്നാൽ തിരുവോണം കഴിഞ്ഞ് മലയാളികൾ പുറത്തിറങ്ങിയതോടെ ആണ് ഓണ തിരക്ക് വർധിച്ചത്. രാവിലെ മുതൽ തന്നെ കോന്നി ഇക്കോ ടൂറിസം സെന്ററിൽ വലിയ തിരക്കായിരുന്നു. ആനത്താവളം സന്ദർശിക്കാൻ എത്തിയവർ ആനകളെയും കണ്ട് മ്യൂസിയവും വന ശ്രീ ഇക്കോ ഷോപ്പിലും എല്ലാം സന്ദർശനം നടത്തിയാണ് മടങ്ങിയത്. ആനത്താവളത്തിനുള്ളിലെ അശോക വനത്തിലും കുട്ടികളുടെ പാർക്കിലും കഫേയിലെ എല്ലാം വലിയ തിരക്ക് അനുഭവപ്പെട്ടു.
ആനത്താവളത്തിൽ എത്തിയ സഞ്ചാരികൾ തണ്ണിത്തോട് അടവി കുട്ടവഞ്ചി സവാരി കേന്ദ്രവും സന്ദർശിച്ചാണ് മടങ്ങിയത്. കനത്ത മഴയെ തുടർന്ന് ജില്ലാ ഭരണ കൂടം കഴിഞ്ഞ മാസം 31 മുതൽ അവധി പ്രഖ്യാപിച്ചിരുന്നതാണ് കുട്ടവഞ്ചിയിൽ. ഇതിന് ശേഷം കാലാവസ്ഥ അനുകൂലമായതോടെ ഒന്പതാം തീയതി ആണ് അടവി കുട്ടവഞ്ചി സവാരി കേന്ദ്രം വീണ്ടും തുറന്നത്. ഇതോടെ കേരളത്തിനകത്തും പുറത്തുമായുള്ള വിനോദ സഞ്ചാരികളുടെ ഒഴുക്ക് ഇവിടേക്ക് വീണ്ടും വർധിച്ചു. സ്കൂളുകൾക്ക് അടക്കം അവധി ലഭിച്ചതോടെ കുടുംബമായി എത്തിയവർ ആയിരുന്നു അധികവും. ആനക്കൂടും അടവിയും സന്ദർശിച്ച ശേഷം മണ്ണീറ വെള്ളച്ചാട്ടവും കണ്ടാണ് സഞ്ചാരികൾ മടങ്ങിയത് .
