കൊച്ചി: ഇലക്ട്രിക് സ്കൂട്ടറിന് മലിനീകരണത്തിന്റെ പേരില് പെറ്റിയടിച്ച് നല്കി മണ്ടത്തരത്തിന്റെ മെഡല് സ്വന്തമാക്കിയിരിക്കുകയാണ് കേരള പോലീസ്. ആതര് കമ്പനിയുടെ ഇലക്ട്രിക് സ്കൂട്ടര് ഉപയോഗിച്ചയാളിനാണ് 250 രൂപയുടെ പെറ്റി. ഇലക്ട്രിക് സ്കൂട്ടറിന്റെയും പെറ്റി ചെലാന്റെയും ചിത്രം സമൂഹമാദ്ധ്യമങ്ങളില് വ്യാപകമായി പ്രചരിക്കുന്നുമുണ്ട്. മലപ്പുറത്തെ നീലഞ്ചേരിയിലെ പോലീസിനാണ് അബദ്ധം പറ്റിയതെന്നാണ് റിപ്പോര്ട്ടുകള് സൂചിപ്പിക്കുന്നത്. പുകക്കുഴല് പോലും ഇല്ലാത്ത സ്കൂട്ടറിന് പുകമലീനീകരണം നടത്തിയെന്നതില് പെറ്റിയടിച്ച പോലീസിനെ ട്രോളുന്നവരുമുണ്ട്.
1988ലെ മോട്ടോര് വാഹന നിയമത്തിന്റെ 213(5)(ഇ) വകുപ്പ് പ്രകാരം റൈഡര്ക്ക് 250 രൂപ പിഴ ചുമത്തിയതായും രസീതില് പറയുന്നുണ്ട്. റിപ്പോര്ട്ടുകള് പ്രകാരം, കേരള പോലീസിന്റെ പിഴയബദ്ധങ്ങള് ഇതാദ്യമല്ല. കഴിഞ്ഞ ജൂലായില് മതിയായ ഇന്ധനമില്ലാതെ മോട്ടോര് സൈക്കിള് ഓടിച്ചതിന് ഒരാള്ക്ക് പിഴ ചുമത്തിയിരുന്നു. ഇതും സമൂഹമാദ്ധ്യമങ്ങളില് ഏറെ ചര്ച്ചയായി.
