തിരുവനന്തപുരം: അനില് ആന്റണിക്കെതിരെ പ്രതിപക്ഷ നേതാവ് വിഡി സതീശന്. അനില് ആന്റണി ബി.ജെ.പിയില് ചേര്ന്നത് കൊണ്ട് കോണ്ഗ്രസിന് ഒന്നും സംഭവിക്കില്ലെന്ന് പ്രതിപക്ഷ നേതാവ് പറഞ്ഞു. കോണ്ഗ്രസിനോ പോക്ഷക സംഘടനകള്ക്കോ നേരിട്ടോ അല്ലാതെയോ എന്തെങ്കിലും സേവനങ്ങള് അനില് ആന്റണി ചെയ്തിട്ടില്ല. ഏല്പ്പിച്ച ചുമതല പോലും അനില് കൃത്യമായി നിര്വഹിച്ചിരുന്നില്ല. അനില് ആന്റണി ബി.ജെ.പിയുടെ കെണിയില് വീഴുകയായിരുന്നെന്നും വി.ഡി. സതീശന് പറഞ്ഞു.
അതേസമയം അനില് ആന്റണി ബിജെപിയില് ചേര്ന്നത് രാഷ്ട്രീയ ആത്മഹത്യയായിപ്പോയെന്ന് കാലം തെളിയിക്കുമെന്ന് യുഡിഎഫ് കണ്വീനര് എം എം ഹസ്സനും പ്രതികരിച്ചു. അനില് കോണ്ഗ്രസ്സ് വിട്ടുപോയത് കേരളത്തില് ഒരു ചലനവും സൃഷ്ടിക്കില്ല. ഒരു പുരുഷായുസ്സ് മുഴുവന് സ്വന്തം ജീവിതം കോണ്ഗ്രസ്സിനു സമര്പ്പിച്ച, അടിയുറച്ച മതേതരവാദിയായ എ.കെ.ആന്റണിയുടെ യശസ്സിനെയും, പാരമ്പര്യത്തെയും അനിലിന്റെ ഈ തീരുമാനം അല്പം പോലും ബാധിക്കില്ലെന്നും എംഎം ഹസ്സന് വ്യക്തമാക്കി.
