ന്യൂഡല്ഹി : സൂപ്പര്മാര്ക്കറ്റുകളിലും പലചരക്ക് കടകളിലും വൈന് വില്ക്കാനുള്ള മഹാരാഷ്ട്ര സര്കാരിന്റെ തീരുമാനത്തിനെതിരെ ഫെബ്രുവരി 14 മുതല് അനിശ്ചിതകാല നിരാഹാര സമരം നടത്തുമെന്ന് സാമൂഹിക പ്രവര്ത്തകന് അണ്ണാ ഹസാരെ. ജനുവരി 27ന് മഹാരാഷ്ട്ര മന്ത്രിസഭ സംസ്ഥാനത്തെ സൂപ്പര്മാര്ക്കറ്റുകളിലും പലചരക്ക് കടകളിലും വൈന് വില്പന അനുവദിക്കുന്നതിനുള്ള നിര്ദേശം പാസാക്കി. ഈ തീരുമാനത്തിനെതിരെ അനിശ്ചിതകാല നിരാഹാര സമരം ആരംഭിക്കുമെന്ന് ശനിയാഴ്ച അണ്ണാ ഹസാരെ മഹാരാഷ്ട്ര മുഖ്യമന്ത്രി ഉദ്ധവ് താക്കറെയ്ക്ക് കത്ത് എഴുതിയിരുന്നു.
സംസ്ഥാന സര്കാരിന്റെ പ്രതികരണം ലഭിക്കാത്തതിനാല് അദ്ദേഹം വീണ്ടും കത്തയച്ചിരുന്നു. തീരുമാനം ദൗര്ഭാഗ്യകരവും വരും തലമുറയ്ക്ക് അപകടകരവുമാണെന്ന് അണ്ണാ ഹസാരെ പ്രതികരിച്ചു. മുഖ്യമന്ത്രിയുടെ ഓഫീസ് പുറത്തിറക്കിയ പ്രസ്താവന പ്രകാരം 1,000 ചതുരശ്ര അടിയോ അതില് കൂടുതലോ വിസ്തീര്ണമുള്ളതും മഹാരാഷ്ട്ര ഷോപ്സ് ആന്ഡ് എസ്റ്റാബ്ലിഷ്മെന്റ് നിയമത്തിന് കീഴില് രജിസ്റ്റര് ചെയ്തിട്ടുള്ളതുമായ സൂപ്പര്മാര്ക്കറ്റുകള്ക്കും സ്റ്റോറുകള്ക്കും ‘ഷെല്ഫ്-ഇന്-ഷോപ്പ്’ രീതി അവലംബിക്കാവുന്നതാണ്. ആരാധനാലയങ്ങള്ക്കും വിദ്യാഭ്യാസ സ്ഥാപനങ്ങള്ക്കും സമീപമുള്ള സൂപര്മാര്കറ്റുകള്ക്ക് വൈന് വില്ക്കാന് അനുമതിയില്ല. കൂടാതെ നിരോധനം നിലനില്ക്കുന്ന ജില്ലകളില് വൈന് വില്പന അനുവദിക്കില്ല. വൈന് വില്ക്കാനുള്ള ലൈസന്സിന് സൂപ്പര്മാര്ക്കറ്റുകള് 5000 രൂപ നല്കണം.
