റാന്നി: ഒക്ടോബർ രണ്ടിന് ഗാന്ധിജയന്തിക്ക് തുടങ്ങുന്ന ലഹരി വിമുക്ത കേരളം ക്യാമ്പയിന്റെ മുന്നോടിയായുള്ള അധ്യാപക പരിവർത്തന പരിപാടിക്ക് റാന്നിയില് തുടക്കമായി. വിദ്യാഭ്യാസ വകുപ്പും സമഗ്ര ശിക്ഷ കേരളയും സംയുക്തമായി നടത്തുന്ന പരിപാടിയിൽ എക്സൈസ്, ആരോഗ്യവകുപ്പ്, പോലീസ് എന്നീ വകുപ്പുകളുടെയും സഹായമുണ്ട്. 29ന് മുമ്പായി സബ്ജില്ലയിലെ പ്രൈമറി മുതൽ ഹയർ സെക്കൻഡറി വരെയുള്ള മുഴുവൻ അധ്യാപകർക്കും രാവിലെയും ഉച്ചയ്ക്കുമായി പരിശീലനം നൽകും. ലഹരിവിമുക്ത ക്യാമ്പയിൻ ഒക്ടോബർ 2 മുതൽ നവംബർ 1 വരെ നടക്കും.
എം എസ് ഹയർ സെക്കൻഡറി സ്കൂളിൽ നടന്ന ബ്ലോക്ക് തല ഉദ്ഘാടനം റാന്നി എംഎൽഎ അഡ്വ. പ്രമോദ് നാരായൺ നിർവഹിച്ചു. ഉപജില്ല വിദ്യാഭ്യാസ ഓഫീസർ റോസമ്മ രാജൻ അധ്യക്ഷത വഹിച്ചു. റാന്നി ഡിവൈഎസ്പി ജി സന്തോഷ് കുമാർ മുഖ്യ പ്രഭാഷണം നടത്തി. വാർഡ് മെമ്പർ സന്ധ്യാദേവി, അധ്യാപക സംഘടന നേതാക്കളായ സന്തോഷ് കുമാർ, സ്മിജു ജേക്കബ്, ഹയർസെക്കൻഡറി സ്കൂൾ പ്രിൻസിപ്പൽ ടീന ഏബ്രഹാം, ഭദ്ര ശങ്കര്, ബിപിസി ഷാജി എ.സലാം, ശൈലു ചെറിയാൻ എന്നിവര് പ്രസംഗിച്ചു.
