ചെങ്ങന്നൂർ : സർക്കാരും സിപിഎമ്മും സംയുക്തമായി നടത്തിക്കൊണ്ടിരിക്കുന്ന വസ്തുതാവിരുദ്ധമായ പ്രചാരണ പ്രവർത്തനം കേരളീയ സമൂഹത്തേയും ഇരകളേയും അങ്ങേയറ്റം കബളിപ്പിക്കുന്നതും ജനങ്ങളെ തമ്മിലടിപ്പിക്കുന്നതുമായ നടപടിയാണെന്ന് സമരസമിതി സംസ്ഥാന ജനറൽ കൺവീനർ എസ്.രാജീവൻ പറഞ്ഞു. കെ – റെയിൽ സിൽവർ ലൈൻ വിരുദ്ധ ജനകീയ സമിതി മുളക്കുഴ തെക്ക് യൂണിറ്റ് പൂപ്പങ്കരമോടിയിൽ സംഘടിപ്പിച്ച വിശദീകരണ യോഗത്തിൽ മുഖ്യപ്രസംഗം നടത്തുകയായിരുന്നു അദ്ദേഹം.
അലൈൻമെന്റ് മാറ്റലോ നഷ്ടപരിഹാരമോ അല്ല സമരസമിതി ആവശ്യപ്പെടുന്നതെന്നും, ഈ വിനാശകരമായ പദ്ധതി സമ്പൂർണ മായും പിൻവലിക്കുക എന്നതാണെന്നും അദ്ദേഹം പ്രഖ്യാപിച്ചു. ഗ്രാമപഞ്ചായത്ത് അംഗം പി.എം സനീഷ് അദ്ധ്യക്ഷത വഹിച്ച യോഗത്തിൽ ജില്ലാ രക്ഷാധികാരി ആർ.പാർഥസാരഥി വർമ്മ, ജില്ലാ കൺവീനർ മധു ചെങ്ങന്നൂർ, യൂണിറ്റ് നേതാക്കളായ സ്റ്റീഫൻ വർഗീസ്, വി.എം രാജൻ, റെജി തോമസ് തുടങ്ങിയവർ പ്രസംഗിച്ചു.
