കളമശ്ശേരി : രാസമാലിന്യം ഒഴുകിയെത്തുന്ന പൊതുമേഖല സ്ഥാപനങ്ങളുടെ പിന്നിലെ പെരിയാറില്നിന്ന് ശേഖരിച്ച സാമ്പിളുകളുടെ പരിശോധന ആഴ്ചകള് പിന്നിട്ടിട്ടും പൂര്ത്തിയായില്ല. ഏലൂരിലെ രണ്ട് കേന്ദ്ര പൊതുമേഖല സ്ഥാപനങ്ങളുടെ പിന്നില് പുഴയില്നിന്ന് മലിനീകരണ നിയന്ത്രണ ബോര്ഡ് ഉന്നത ഉദ്യോഗസ്ഥര് ശേഖരിച്ച മാലിന്യസാമ്പിളിന്റെ പരിശോധനഫലങ്ങളാണ് പൂര്ത്തിയാക്കാത്തത്. ബോര്ഡിന്റെ പ്രധാന ലാബിലെത്തിച്ച ഇവ ഇനിയും പരിശോധിച്ചിട്ടില്ല. ലാബിലെ തകരാറുകളാണ് പരിശോധന വൈകുന്നതെന്നാണ് ഉദ്യോഗസ്ഥര് നല്കുന്ന വിശദീകരണം.
മാര്ച്ച് 15 നാണ് മലിനീകരണത്തെത്തുടര്ന്ന് ഉദ്യോഗസ്ഥര് പെരിയാറില് പരിശോധന നടത്തിയത്. ഇതിനിടെയാണ് പൊതുമേഖല സ്ഥാപനങ്ങളുടെ പിന്നില് രൂക്ഷമായ നിലയില് പല നിറത്തിലെ മാലിന്യം ഒഴുകിയെത്തുന്നത് ശ്രദ്ധയില്പെടുന്നത്. ഉടന് മാലിന്യത്തിന്റെ സാമ്പിളുകള് ശേഖരിക്കുകയായിരുന്നു. പിന്നാലെ പൊതുമേഖല കമ്പനികള്ക്ക് വിശദീകരണം ചോദിച്ച് പി.സി.ബി നോട്ടീസ് നല്കി. എന്നാല് തുടര്നടപടിയെന്നും അധികൃതരുടെ ഭാഗത്തുനിന്ന് ഉണ്ടായില്ലെന്നാണ് ഉദ്യോഗസ്ഥര്ക്കൊപ്പം പരിശോധനയില് സഹായികളായുണ്ടായിരുന്ന ഏലൂരിലെ ജനജാഗ്രത പ്രവര്ത്തകര് ആരോപിക്കുന്നത്. അതേസമയം, സ്ഥാപനങ്ങള്ക്ക് പിന്നില് മലിനജലം പെരിയാറിലൂടെ ഒഴുക്ക് തുടരുകയാണ്. കഴിഞ്ഞ ശനി, ഞായര് ദിവസങ്ങളില് ഏലൂര് മേത്താനം ഭാഗം വരെ മാലിന്യം വ്യാപിച്ചുകിടന്നതായും ജാഗ്രത പ്രവര്ത്തകര് പറഞ്ഞു.
