കോയമ്പത്തൂർ : കഞ്ചാവുവില്പന സംഘവുമായി ബന്ധമുള്ള പോലീസുകാരനെ കോയമ്പത്തൂരിൽ അറസ്റ്റുചെയ്തു. ആംഡ് റിസർവ് പോലീസിലെ കോൺസ്റ്റബിൾ ഗണേഷ് കുമാറിനെയാണ് (33) അറസ്റ്റുചെയ്തത്. പോലീസ് റിക്രൂട്ടിങ് സ്കൂൾ ക്വാർട്ടേഴ്സിലെ ഇയാളുടെ മുറിയിൽനിന്ന് രണ്ടുകിലോ കഞ്ചാവ് കണ്ടെടുത്തു. ഇയാളെ സിറ്റിപോലീസ് കമ്മിഷണർ പ്രദീപ്കുമാർ സസ്പെൻഡുചെയ്തു.
മൂന്നുദിവസംമുമ്പ് കഞ്ചാവുവില്പനക്കാരായ ഒരുസംഘം പുതുക്കോട്ട ജില്ലയിൽ പോലീസിന്റെ പിടിയിലായിരുന്നു. ഗണേശ് കുമാറിൽനിന്നാണ് കഞ്ചാവ് കിട്ടിയതെന്ന് അവർ നൽകിയ മൊഴിയിൽ പറഞ്ഞിരുന്നു. തുടർന്ന് പുതുക്കോട്ട സ്പെഷ്യൽ സ്ക്വാഡ് ഗണേഷ് കുമാറിനെ കസ്റ്റഡിയിലെടുക്കുകയായിരുന്നു. കോടതിയിൽ ഹാജരാക്കിയ ഗണേഷ് കുമാറിനെ റിമാൻഡ് ചെയ്തു.
