ആറന്മുള : ആറന്മുള വള്ളസദ്യവഴിപാടിന് നാളെ തുടക്കം. ജൂലൈ 13 മുതൽ ഒക്ടോബർ 2 വരെ നീണ്ടു നിൽക്കുന്ന വള്ളസദ്യ വഴിപാടിൽ ഇത് വരെ ഏകദേശം 400 വള്ളസദ്യകൾ ബുക്കിങ് ആയി കഴിഞ്ഞു. ആദ്യ ദിവസത്തെ വള്ളസദ്യ വഴിപാടിൽ കോഴഞ്ചേരി, തെക്കേമുറി, ളാക – ഇടയാറന്മുള, പൂവത്തൂർ പടിഞ്ഞാറ്, ഓതറ, കോടിയാട്ടുകര, വെൺപാല – കദളിമംഗലം എന്നി 7 പള്ളിയോടങ്ങളാണ് പങ്കെടുക്കുന്നത്. പള്ളിയോട സേവാസംഘം സംഘടിപ്പിക്കുന്ന വഞ്ചിപ്പാട്ട് സോപാനം ഓഗസ്റ്റ് 10 മുതൽ 30 വരെ ക്ഷേത്രസന്നിധിയിൽ നടക്കും.
സോപാനം മത്സരവിജയികൾക്ക് 52 പവൻ സ്വർണത്തിൽ നിർമ്മിച്ച വഞ്ചിപ്പാട്ട് സോപാനം എവറോളിങ് സുവർണ ട്രോഫിയും 25000 രൂപയും സമ്മാനമായി ലഭിക്കുന്നതാണ്. രണ്ടും മുന്നും സ്ഥാനക്കാർക്ക് യഥാക്രമം 15000 രൂപയും 10000 രൂപയും സമ്മാനമായി ലഭിക്കും. ഈ വർഷത്തെ അഷ്ടമിരോഹിണി വള്ളസദ്യ സെപ്റ്റംബർ 14ന് നടക്കും. ഭഗവാന്റെ ജന്മാഷ്ടമിനാളിൽ നടക്കുന്ന വിശ്വപ്രസിദ്ധമായ അഷ്ടമിരോഹിണി വള്ളസദ്യയിൽ 52 പള്ളിയോടകരക്കാരും ഭക്തജനങ്ങളും പങ്കെടുക്കും. ഭഗവാന്റെ തിരുമുറ്റത്ത് ജന്മഷ്ടമിദിനത്തിൽ പതിനായിരങ്ങൾക്ക് പിറന്നാൾസദ്യ വിളമ്പും.അതിന് മുന്നോടിയായി ചേനപ്പാടി കരക്കാരുടെ പാളതൈര് സമർപ്പണവും നടക്കും.
