തിരുവനന്തപുരം: കേരള സര്വകലാശാലയ്ക്കും സര്ക്കാരിനുമെതിരെ ഗവര്ണര് ആരിഫ് മുഹമ്മദ് ഖാന്. കേരള സര്വകലാശാലയില് കുത്തഴിഞ്ഞ ഭരണസംവിധാനമാണ് നടക്കുന്നതെന്ന് ഗവര്ണര് കുറ്റപ്പെടുത്തി. കായംകുളത്തെ എസ്എഫ്ഐ നേതാവ് നിഖില് തോമസിന്റെ വ്യാജരേഖാ വിവാദമുള്പ്പെടെയുള്ള വിഷയങ്ങളില് മാധ്യമപ്രവര്ത്തകരോട് പ്രതികരിക്കുകയായിരുന്നു ഗവര്ണര്. കേരളത്തിലെ ഉന്നത വിദ്യാഭ്യാസ മേഖല തകര്ന്ന അവസ്ഥയിലാണുള്ളതെന്നും ഗവര്ണര് കുറ്റപ്പടുത്തി.
ഇവിടെ ഇപ്പോള് നടക്കുന്ന പ്രവര്ത്തനങ്ങള് കേരളത്തിലെ ഉന്നത വിദ്യാഭ്യാസ മേഖലയെ തരിപ്പണമാക്കും. കുട്ടികള് വിദ്യാഭ്യാസത്തിനായി പുറം നാടുകളിലേക്ക് പോകുകയാണെന്നും ഗവര്ണര് പറഞ്ഞു. കേരളത്തിലെ വിദ്യാര്ത്ഥികളുടെ ഭാവി വെച്ചാണ് സര്ക്കാര് കളിക്കുന്നതെന്നും ഗവര്ണര് ആരോപിച്ചു. വിദ്യാഭ്യാസ യോഗ്യതയില്ലാത്ത ഒരാള്ക്ക് അസോസിയേറ്റ് പ്രൊഫസറായി നിയമനം നല്കിയെന്നും ഗവര്ണര് പറഞ്ഞു.
