ഡല്ഹി : കരസേനയുടെ അടുത്ത മേധാവിയായി ലഫ്. ജനറല് മനോജ് പാണ്ഡെയെ നിയമിച്ചു. നിലവില് സേനയുടെ ഉപമേധാവിയാണ്. ഈ മാസം ഒടുവില് വിരമിക്കുന്ന ജനറല് എം.എം. നരവനെയുടെ പിന്ഗാമിയായി മേയ് 1 നു ചുമതലയേല്ക്കും. പ്രധാനമന്ത്രി നരേന്ദ്ര മോദിയുടെ അധ്യക്ഷതയില് ചേര്ന്ന മന്ത്രിസഭാ നിയമന സമിതിയാണു പുതിയ മേധാവിയെ തീരുമാനിച്ചത്.
സേനയിലെ എന്ജിനീയറിങ് കോറില് നിന്ന് മേധാവിയാകുന്ന ആദ്യത്തെയാളാണു പാണ്ഡെ. നരവനെയ്ക്കു ശേഷം സേനയിലെ ഏറ്റവും സീനിയര് ഉദ്യോഗസ്ഥനായ പാണ്ഡെ, കൊല്ക്കത്ത ആസ്ഥാനമായ കിഴക്കന് കമാന്ഡിന്റെ മേധാവിയായിരുന്നു. 1982 ല് സേനയില് ചേര്ന്നു. നാഗ്പുര് സ്വദേശിയാണ്.
