തിരുവനന്തപുരം : സൈനിക നിയമനങ്ങള് അഗ്നിപഥ് വഴി ആക്കിയതോടെ കേരളത്തില് രണ്ടായിരത്തിലേറെ ഉദ്യോഗാര്ത്ഥികളുടെ കാര്യം അനിശ്ചിതത്വത്തിലായി. 2366 പേര് എഴുത്ത് പരീക്ഷയ്ക്ക് യോഗ്യത നേടി കാത്തിരിക്കുമ്പോഴാണ് നിയമന രീതി അടിമുടി മാറിയത്. കൊവിഡ് കാരണം നടക്കാതിരുന്ന 2020 ലെ സൈനിക റിക്രൂട്ട്മെന്റ് കേരളത്തില് നടന്നത് 2021 ഫെബ്രുവരിയിലാണ്. തിരുവനന്തപുരം കോഴിക്കോട് റിക്രൂട്ട്മെന്റ് ഓഫീസര്മാരുടെ നേതൃത്വത്തില് സംയുക്തമായി ആയിരുന്നു റാലി.
ജനറല് ഡ്യൂട്ടി ടെക്നിക്കല്, ട്രേഡ്സ്മാന് , ക്ലര്ക്ക്, നഴ്സിംഗ് അസിസ്റ്റന്റ് തസ്തികളിലായിരുന്നു റാലി. ജനറല് ഡ്യൂട്ടിക്ക് പരമാവധി പ്രായം 21 ആയിരുന്നു. മറ്റ് തസ്തികകളില് 23 ഉം. കാര്യവട്ടം ഗ്രീന്ഫീല്ഡ് സ്റ്റേഡിയത്തില് നടന്ന റാലിയില് 80000 പേര് പങ്കെടുത്തു. 2366 പേര് എഴുത്ത് പരീക്ഷയ്ക്ക് യോഗ്യത നേടി. ഏപ്രിലില് പരീക്ഷ നടക്കുമെന്ന് അറിയിപ്പ് ലഭിച്ചത് എങ്കിലും ആറ് പ്രാവശ്യം തീയതി നീട്ടി. ഇപ്പോള് അഗ്നിപഥ് പദ്ധതി പ്രഖ്യാപിച്ചതോടെ ഇവരുടെ കാര്യം അനിശ്ചിതത്വത്തിലായി. ഇവരില് ഭൂരിപക്ഷത്തിനും അഗ്നിപഥ് വഴി നിയമനം നേടാനുള്ള പ്രായപരിധി കഴിഞ്ഞു. സാധാരണ രീതിയിലുള്ള സൈനിക റിക്രൂട്ട്മെന്റ് തുടരണമെന്നും തങ്ങളുടെ ഇത്രയും കാലത്തേ അധ്വാനത്തിന് വില കല്പ്പിക്കണം എന്നുമാണ് ഇവരുടെ ആവശ്യം.
