മുംബൈ: തന്റെ ജീവന്‍ അപകടത്തിലാണെന്നും രക്ഷിക്കാന്‍ സുപ്രീംകോടതി ഇടപെടണമെന്നും ആത്മഹത്യാ പ്രേരണക്കേസില്‍ അറസ്റ്റിലായ റിപബ്ലിക് ടി.വി എഡിറ്റര്‍ ഇന്‍ ചീഫ് അര്‍ണബ് ഗോസ്വാമി. തലോജ ജയിലിലേക്ക് കൊണ്ടുപോകവേ പോലീസ് വാനില്‍ നിന്നായിരുന്നു അര്‍ണബിന്റെ രോദനം.
”ഞാന്‍ അവരോട്അഭിഭാഷകനോട് സംസാരിക്കാന്‍ സമയം ചോദിച്ചു. പക്ഷേ അനുവദിച്ചില്ല. എന്റെ ജീവന്‍ അപകടത്തിലാണെന്ന് ഈ രാജ്യത്തെ ജനങ്ങളോട്പറയുന്നു. ഞാന്‍ പുറത്തുവരുന്നത്അവര്‍ക്കാവശ്യമില്ല. അവര്‍ കാര്യങ്ങള്‍ വൈകിക്കുകയാണ്. നിങ്ങള്‍ക്ക് എന്റെ സാഹചര്യം കാണാം. അവര്‍ രാവിലെ എന്നെ വലിച്ചിഴച്ചു. ഇന്നലെ രാത്രി ജയിലിലടക്കാന്‍ നോക്കി. എനിക്ക് ജാമ്യം ലഭിക്കാന്‍ സുപ്രീംകോടതി ഇടപെടണമെന്ന് ഞാന്‍ അപേക്ഷിക്കുന്നു” -അര്‍ണബ് ഗോസ്വാമി റിപ്ലബ്ലിക് ടി.വി റിപ്പോര്‍ട്ടറോട് പോലീസ് വാനില്‍ നിന്നും പ്രതികരിച്ചു.
ഇന്‍റീരിയര്‍ ഡിസൈനര്‍ അന്‍വയ് നായികും മാതാവ് കുമുദ് നായികും 2018ല്‍ ആത്മഹത്യ ചെയ്തതുമായി ബന്ധപ്പെട്ട് ആത്മഹത്യാ പ്രേരണക്കുറ്റം ചുമത്തിയാണ് അര്‍ണബിനെ മുംബൈ പോലീസ് അറസ്റ്റ് ചെയ്തത്. ബുധനാഴ്ച രാവിലെ വീട്ടിലെത്തി അറസ്റ്റ് ചെയ്യുകയായിരുന്നു. തുടര്‍ന്ന് കോടതി 14 ദിവസത്തെ ജുഡീഷ്യല്‍ കസ്റ്റഡിയില്‍ വിടുകയായിരുന്നു. റായിഗഡ് ജയിലിലെ കോവിഡ് നിരീക്ഷണ കേന്ദ്രത്തിലാണ് അര്‍ണബ് ഗോസ്വാമിയെ പാര്‍പ്പിച്ചിരുന്നത്.
