കോട്ടയം: പോപ്പുലര് ഫ്രണ്ട് നേതാവ് എ എ റൗഫിന്റെ ഫേസ്ബുക്ക് പോസ്റ്റ് വനിതാ എ എസ് ഐ ഷെയര് ചെയ്ത സംഭവത്തില് കടുത്ത അച്ചടക്ക നടപടിയുമായി ഉന്നത പോലീസ് നേതൃത്വം. കാഞ്ഞിരപ്പള്ളി പോലീസ് സ്റ്റേഷനിലെ വനിത എ എസ് ഐ ഈരാറ്റുപേട്ട സ്വദേശിനി റംല ഇസ്മയിലിനെ സസ്പെന്ഡ് ചെയ്തു. മധ്യമേഖലാ ഡിഐജി നീരജ് കുമാര് ഗുപ്ത ആണ് റംലയെ സസ്പെന്ഡ് ചെയ്തുകൊണ്ട് ഉത്തരവിറക്കിയത്.
സംഭവത്തെക്കുറിച്ച് അന്വേഷണം നടത്തിയ കാഞ്ഞിരപ്പള്ളി ഡിവൈഎസ്പി ബാബുക്കുട്ടന് ജില്ലാ പോലീസ് മേധാവി കെ കാര്ത്തിക്കിന് റിപ്പോര്ട്ട് നല്കിയിരുന്നു. ഇത് പരിശോധിച്ച ശേഷം ജില്ലാ പോലീസ് മേധാവി ഡിഐജി നീരജ് കുമാര് ഗുപ്തക്ക് റിപ്പോര്ട്ട് നല്കുകയായിരുന്നു. റംലക്കെതിരെ നടപടിയെടുക്കണം എന്ന ശുപാര്ശ ചെയ്തുകൊണ്ടാണ് ജില്ലാ പോലീസ് മേധാവി റിപ്പോര്ട്ട് നല്കിയത്. ഇത് പരിഗണിച്ചുകൊണ്ടാണ് റംല ഇസ്മയിലിനെ സസ്പെന്ഡ് ചെയ്യാന് ഉന്നത പോലീസ് നേതൃത്വം തീരുമാനമെടുത്തത്.
