എരമംഗലം : പൊന്നാനിയില് സി.പി.എം. സ്ഥാനാര്ഥിയായി പി. നന്ദകുമാറിനെ പ്രഖ്യാപിച്ചതിനു പിന്നാലെ വെളിയങ്കോട് പത്തുമുറിയില് പാര്ട്ടി പ്രവര്ത്തകരുടെ പ്രതിഷേധം. സി.പി.എം. പത്തുമുറി ബ്രാഞ്ച് കമ്മിറ്റി ഓഫീസ് പ്രവര്ത്തകരെത്തി അടച്ചുപൂട്ടി. ഓഫീസിലുണ്ടായിരുന്ന ഫയലുകള്, തോരണങ്ങള്, പാര്ട്ടി ചിഹ്നത്തിന്റെ പോസ്റ്ററുകള് തുടങ്ങിയവ പ്രവര്ത്തകര് മുദ്രാവാക്യം വിളികളോടെ കത്തിക്കുകയായിരുന്നു. ബ്രാഞ്ച്കമ്മിറ്റി ഓഫീസ് ഇനിമുതല് പ്രവാസിക്കൂട്ടം പത്തുമുറിയുടെ ഓഫീസാക്കുമെന്നാണ് പ്രതിഷേധക്കാര് പറയുന്നത്.
പ്രവാസികളായ പാര്ട്ടി അനുഭാവികളുടെ സംഘടനയാണ് പ്രവാസിക്കൂട്ടം പത്തുമുറി. ഇവരുടെ സഹായത്താലാണ് പാര്ട്ടി ഓഫീസ് പ്രവര്ത്തിച്ചിരുന്നത്. നിലവില് പൊന്നാനിയില് പാര്ട്ടി അണികളിലും അനുഭാവികളിലുമുള്ള വൈകാരിക പ്രകടനത്തിന്റെ ഭാഗമായാണ് ഓഫീസ് ഒഴിവാക്കിയതുള്പ്പെടെയുള്ള അനിഷ്ടസംഭവങ്ങള്ക്ക് വഴിവെച്ചതെന്ന് സി.പി.എം. പത്തുമുറി ബ്രാഞ്ച് സെക്രട്ടറി എം.എം. ബാദുഷ പ്രമുഖ മാധ്യമത്തിനോട് പറഞ്ഞു.
