ബംഗളൂരു : സ്വത്തുതര്ക്കവുമായി ബന്ധപ്പെട്ട് മാണ്ഡ്യയില് പിതാവിനെ മക്കള് കുത്തിക്കൊന്നു. ശ്രീരംഗപട്ടണ കെരമകളു കൊപ്പലു വില്ലേജ് സ്വദേശി മാരിക്കലയ്യയാണ് (68) കൊല്ലപ്പെട്ടത്. കേസില് മക്കളായ ശശികുമാര്, രാജേഷ് എന്നിവര് അറസ്റ്റിലായി. മാരിക്കലയ്യക്ക് സ്വന്തമായി എട്ട് ഏക്കര് ഭൂമിയുണ്ടായിരുന്നതില്നിന്ന് ഒരേക്കര് 30 ലക്ഷത്തിന് വില്ക്കാന് തീരുമാനിച്ചിരുന്നു. മക്കള് രണ്ടു പേരും ബംഗളൂരുവില് കാബ് ഡ്രൈവര്മാരായി ജോലി ചെയ്തുവരുകയാണ്. 30 ലക്ഷം രൂപ അച്ഛനും മക്കളും കൂടി വീതം വെക്കാമെന്നും തന്റെ വിഹിതമായ 10 ലക്ഷം രൂപ കൈമാറിയാലേ ഭൂമി രജിസ്ട്രേഷന് ഒപ്പിടൂവെന്നും മാരിക്കലയ്യ പറഞ്ഞിരുന്നു. എന്നാല് രജിസ്ട്രേഷന് സമയത്ത് മക്കള് പണം നല്കാതിരുന്നതോടെ ഇയാള് ഒപ്പിടാതെ വീട്ടിലേക്ക് മടങ്ങി.
തുടര്ന്ന് തന്റെ ജീവന് ഭീഷണിയുണ്ടെന്ന് കാണിച്ച് അരീക്കരെ പോലീസ് സ്റ്റേഷനില് മക്കള്ക്കെതിരെ കേസ് നല്കി. കഴിഞ്ഞദിവസം രാത്രി ഗ്രാമത്തിലെത്തിയ മക്കള് പിതാവിനെ കത്തി ഉപയോഗിച്ച് കുത്തുകയായിരുന്നു. നിരവധി കുത്തുകളേറ്റ ഇയാളെ ഗുരുതര പരിക്കുകളോടെ നാട്ടുകാര് മൈസൂരുവിലെ ആശുപത്രിയലെത്തിച്ചെങ്കിലും രക്ഷിക്കാനായില്ല. അരീക്കരെ പോലീസ് കേസെടുത്തു.
