ചേലക്കര : വളര്ത്തുനായയെ ഉടമ ജീവനോടെ കത്തിച്ചെന്ന ആരോപണത്തില് ഉടമയുടെ പേരില് പോലീസ് കേസെടുത്തു. ചേലക്കര ചാക്കപ്പന്പടി കോല്പ്പുറം പ്രദേശത്ത് പുരുഷോത്തമന് എന്ന 47 കാരന്റെ പേരിലാണ് കേസെടുത്തിരിക്കുന്നത്. പുരുഷോത്തമന്റെ വീട്ടിലെ വളര്ത്തുനായ ചങ്ങല പൊട്ടിച്ച് വീടിനു പുറത്തേക്ക് വരുന്നതിനെതിരേ അയല്വാസികള് പരാതിപ്പെട്ടിരുന്നു. ഇതിനിടെ നായ പുരുഷോത്തമനെ കടിച്ചതായും ഇതില് പ്രകോപിതനായ പ്രതി നായയെ മണ്ണെണ്ണയൊഴിച്ച് കത്തിച്ചെന്നുമാണ് പ്രാഥമിക വിവരം. സംഭവമറിഞ്ഞു പോലീസ് സ്ഥലത്തെത്തിയപ്പോള് വീടിനോടു ചേര്ന്ന് നായയെ കുഴിച്ചിട്ട നിലയിലായിരുന്നു.
പുരുഷോത്തമന് നായയെ ജീവനോടെ മണ്ണെണ്ണയൊഴിച്ച് കത്തിക്കുകയും ദേഹത്ത് തീപടര്ന്ന് നായ ജീവരക്ഷയ്ക്കായി ഓടുന്നത് കണ്ടുവെന്നുമാണ് അയല്വാസികള് പോലീസിന് നല്കിയ മൊഴി. അതേസമയം നായയെ ക്രൂരമായി മര്ദിച്ചതായും ഇവര് പറയുന്നു. കത്തിക്കരിഞ്ഞ നായയുടെ ജഡം പോസ്റ്റുമോര്ട്ടത്തിന് അയച്ചിട്ടുണ്ട്. പരിശോധനയിലൂടെ മാത്രമേ മരണകാരണം വ്യക്തമാവുകയുള്ളൂവെന്നും സംഭവത്തില് പ്രാഥമികമായി ലഭിച്ച വിവരത്തിന്റെ അടിസ്ഥാനത്തില് ഉടമയുടെപേരില് കേസെടുത്തതായും ചേലക്കര പോലീസ് ഐ.എസ്.എച്ച്.ഒ. ബാലകൃഷ്ണന് പറഞ്ഞു. അതേസമയം, പുരുഷോത്തമന് നെഞ്ചുവേദനയെ തുടര്ന്ന് മെഡിക്കല് കോളേജ് ആശുപത്രിയില് ചികിത്സയിലായതിനാല് അറസ്റ്റ് രേഖപ്പെടുത്താന് സാധിച്ചിട്ടില്ല.
