അതിരപ്പിള്ളി : വിനോദസഞ്ചാര മേഖലയിലെ വ്യൂ പോയിന്റിൽനിന്ന് ഇനി അതിരപ്പിള്ളി വെള്ളച്ചാട്ടം കൺകുളിർക്കെ കാണാം. സഞ്ചാരികളെ നിരാശരാക്കി വെള്ളച്ചാട്ടത്തിന്റെ കാഴ്ച മറച്ച മരച്ചില്ലകൾ മുഴുവൻ മുറിച്ചുനീക്കി. ആറ് മരങ്ങളുടെ ചില്ലകൾ വെട്ടിമാറ്റിയാണ് മനോഹരമായ കാഴ്ചയൊരുക്കിയത്.
ഭിന്നശേഷിക്കാർക്കും വയോധികർക്കും വെള്ളച്ചാട്ടത്തിന്റെ മുകളിലേക്കു പോകുന്നത് ശ്രമകരമായതിനാൽ അവർക്കും മറ്റു സഞ്ചാരികൾക്കും വെള്ളച്ചാട്ടം മുഴുവനായി കണ്ട് ആസ്വദിക്കാനുള്ള ഏക സ്ഥലമാണ് വ്യൂ പോയിന്റ്. വ്യൂ പോയിന്റിന് താഴെയുള്ള സ്വകാര്യ റിസോർട്ട് ഉടമകളുടെ പറമ്പിൽ നിൽക്കുന്ന മരങ്ങൾ വളർന്നാണ് വെള്ളച്ചാട്ടത്തിന്റെ കാഴ്ച മറച്ചിരുന്നത്. മരച്ചില്ലകൾ മൂലം വെള്ളച്ചാട്ടം ഭാഗികമായാണ് കാണാനായിരുന്നത്. വെള്ളച്ചാട്ടത്തിന്റെ മനോഹരമായ കാഴ്ച മറഞ്ഞത് ഇവിടെയെത്തുന്ന എല്ലാ സഞ്ചാരികളെയും നിരാശരാക്കിയിരുന്നു.
