തിരൂർ : പെൺകുട്ടിയുമായി വാട്സ്ആപ്പിൽ ചാറ്റ് ചെയ്തുവെന്നാരോപിച്ച് യുവാവിന് നേരെ ആക്രമണം. മലപ്പുറം തിരൂരിലെ ചെറിയമുണ്ടത്താണ് സംഭവം. പെൺകുട്ടിയുടെ സഹോദരനടക്കം ഒരു സംഘം ആളുകൾ യുവാവിനെ മർദിക്കുകയായിരുന്നു. യുവാവിന്റെ വീട്ടുകാരുടെ പരാതിയിൽ പോലീസ് കേസെടുത്തു.
ഒരാഴ്ച മുമ്പാണ് സംഭവം നടന്നത്. മർദിക്കുന്ന ദൃശ്യം മൊബൈൽ ഫോണിൽ പകർത്തി പ്രചരിപ്പിക്കുകയും ചെയ്തിരുന്നു. യുവാവിന് മാനസികാസ്വാസ്ഥ്യം ഉളളതായാണ് വീട്ടുകാർ പറയുന്നത്. യുവാവ് ശാരീരിക വിഷമങ്ങൾ പ്രകടിപ്പിച്ചതിനെ തുടർന്ന് ആശുപത്രിയിൽ പ്രവേശിപ്പിക്കുകയായിരുന്നു. തുടർന്നാണ് വീട്ടുകാർ പോലീസിൽ പരാതി നൽകുന്നത്. ഏഴുപേർക്കെതിരേ പോലീസ് കേസെടുത്തിട്ടുണ്ട്. ഏഴുപേർക്കും പ്രായപൂർത്തിയായിട്ടില്ലെന്ന് പോലീസ് പറഞ്ഞു.