കുമ്പള: ഓട്ടോറിക്ഷയുടെ മുന്‍ചക്രം ഊരിത്തെറിച്ചതോടെ നിയന്ത്രണം വിട്ട് മറിഞ്ഞുണ്ടായ അപകടത്തില്‍ പിഞ്ചുകുഞ്ഞ് മരിച്ചു. കുഞ്ഞ് മാതാവിന്റെ കൈയില്‍നിന്ന് റോഡിലേക്ക് തെറിച്ച്‌ വീഴുകയായിരുന്നു. കൊക്കച്ചാല്‍ പിലന്തൂറിലെ ഖാസിം-ഫായിസ ദമ്പതിമാരുടെ മകന്‍ റിസ്‌വാന്‍ (രണ്ട്) ആണ് മരിച്ചത്.
ഓട്ടോയുടെ മുന്‍ചക്രത്തിന്റെ ബോള്‍ട്ടിന് പ്രശ്നമുണ്ടായിരുന്നു. ഇത് നന്നാക്കാനായി വര്‍ക്ക്‌ ഷോപ്പിലേക്ക് പോവുകയായിരുന്ന ഓട്ടോയാണ് അപകടത്തില്‍പ്പെട്ടത്. ബന്തിയോട് ഭാഗത്തേക്ക് പോവാന്‍ നില്‍ക്കുകയായിരുന്ന കുട്ടിയുടെ മാതാവ് കൈ കാണിച്ചപ്പോള്‍ ഡ്രൈവര്‍ അവരെ ഓട്ടോയില്‍ കയറ്റുകയായിരുന്നു എന്ന് പോലീസ് പറയുന്നു.
മീപ്പിരി വളവെത്തിയപ്പോള്‍ ബോള്‍ട്ട് ഇളകിയതിനെത്തുടര്‍ന്ന് മുന്‍ചക്രം ഊരിത്തെറിച്ച ഓട്ടോ റോഡിലിടിച്ച്‌ മറിഞ്ഞു. ഇടിയുടെ ആഘാതത്തില്‍ കുഞ്ഞ് റോഡിലേക്ക് തെറിച്ച്‌ വീഴുകയായിരുന്നു. വീഴ്ചയില്‍ തല തകര്‍ന്ന കുഞ്ഞ് അപകടസ്ഥലത്തുതന്നെ മരിച്ചതായി പോലീസ് പറഞ്ഞു. ഓട്ടോയുടെ പ്രശ്നം കാര്യമാക്കാതെയാണ് ഡ്രൈവര്‍ ഇവരെ വാഹനത്തില്‍ കയറ്റിയതെന്നും ആരോപണമുണ്ട്. ഡ്രൈവര്‍ കയ്യാറിലെ പ്രസാദി (26) നെതിരേ കുമ്പള പോലീസ് കേസെടുത്തു.
