കോന്നി : പുനലൂര് – മൂവാറ്റുപുഴ സംസ്ഥാന പാതയിലെ കൂടല് സ്റ്റേഡിയം ജംഗ്ഷനില് ഓട്ടോറിക്ഷയും ബുള്ളറ്റും കൂട്ടിയിടിച്ച് മൂന്നുപേര്ക്ക് പരിക്കേറ്റു. ഓട്ടോ ഡ്രൈവര് രവി, ഓട്ടോറിക്ഷയില് യാത്ര ചെയ്തിരുന്ന സൂസന്, ബുള്ളറ്റ് യാത്രികനായ ബിബിന് എന്നിര്ക്കാണ് പരിക്കേറ്റത്. ഇതില് രവിയുടെയും ബിബിന്റെയും നില ഗുരുതരമാണ്. രവിയെ തിരുവനന്തപുരം മെഡിക്കല് കോളേജിലും ബിബിനെ കോട്ടയം മെഡിക്കല് കോളേജിലും പ്രവേശിപ്പിച്ചു. കൂടലില് നിന്നും കോന്നി ഭാഗത്തേക്ക് വന്ന ഓട്ടോറിക്ഷ വലത് ഭാഗത്തേക്ക് തിരിയുന്നതിനിടെ കോന്നി ഭാഗത്ത് നിന്നും വന്ന ബുള്ളറ്റ് ഓട്ടോയില് ഇടിച്ച് മറിയുകയായിരുന്നു. അപകടത്തില് ഓട്ടോ റിക്ഷയുടെ മുന്ഭാഗം തകര്ന്നിട്ടുണ്ട്.
സംസ്ഥാന പാതയില് ഈ ഭാഗത്ത് നിരവധി അപകടങ്ങള് മുന്പും നടന്നിട്ടുണ്ട്. മുറിഞ്ഞകല് മുതല് കൂടല് വരെയുള്ള നേര്രേഖയിലുള്ള റോഡില് അമിത വേഗതയിലാണ് വാഹനങ്ങള് സഞ്ചരിക്കുന്നത്. ഈ ഭാഗത്തെ ഇടറോഡുകളില് നിന്നും സംസ്ഥാന പാതയിലേക്ക് വാഹനങ്ങള് ശ്രദ്ധയില്ലാതെ കടന്നുവരുന്നതും അപകടങ്ങള്ക്ക് കാരണമാകുന്നുണ്ട്. ശബരിമല മണ്ഡല കാലത്താണ് ഇവിടെ ഏറ്റവും കൂടുതല് വാഹനാപകടങ്ങള് നടന്നിട്ടുള്ളത്.
