കൊച്ചി : മോഷ്ടിച്ച ഓട്ടോറിക്ഷയുമായി യുവാക്കള് പോലീസിന്റെ പിടിയിലായി. മട്ടാഞ്ചേരി സ്വദേശികളായ മാളിയേക്കല് പറമ്പില് ഷിഹാബ് (21), തുണ്ടിപറമ്പില് മുന്സില് (25) എന്നിവരെയാണ് കടവന്ത്ര പോലീസ് അറസ്റ്റ് ചെയ്തത്. ഇവര് നിരവധി വാഹന മോഷണ കേസുകളില് പ്രതികളാണ്. തിങ്കളാഴ്ച രാത്രി പൊന്നുരുന്നി പാലത്തിനു സമീപം വാഹന പരിശോധന നടത്തുന്നതിനിടെ സംശയാസ്പദമായി കണ്ട ഓട്ടോറിക്ഷയ്ക്കു പോലീസ് കൈ കാണിച്ചെങ്കിലും നിര്ത്താതെ പോവുകയായിരുന്നു. ഓട്ടോറിക്ഷയെ പിന്തുടര്ന്ന് പിടികൂടുകയും ഓട്ടോയിലുണ്ടായിരുന്നവരെ ചോദ്യം ചെയ്യുകയും ചെയ്തപ്പോഴാണ് മോഷണ വിവരം പുറത്തുവന്നത്.
കടവന്ത്ര പി ആന്ഡ് ടി കോളനിയില് നിന്ന് ഒരു ഓട്ടോ മോഷ്ടിക്കുകയും അത് ഇടുക്കി വെള്ളത്തൂവലില് ഉപേക്ഷിക്കുകയും, തുടര്ന്ന് അവിടെനിന്നു മറ്റൊരു ഓട്ടോ തട്ടിയെടുത്ത് വരുന്നതിനിടെയാണ് പ്രതികള് കുടുങ്ങിയതെന്ന് പോലീസ് പറഞ്ഞു. എംജി റോഡില് നിന്നു വാഹനം മോഷ്ടിച്ച കേസില് മുന്സിലിനെ മുമ്പ് എറണാകുളം സൗത്ത് പോലീസ് അറസ്റ്റു ചെയ്തിട്ടുണ്ട്. പ്രതികളെ കോടതിയില് ഹാജരാക്കി റിമാന്ഡ് ചെയ്തു.