ന്യൂഡല്ഹി : പ്രധാനമന്ത്രി ആവാസ് യോജന വഴി 80 ലക്ഷം വീടുകള് നിര്മ്മിച്ച് കൊടുക്കുമെന്ന കേന്ദ്ര ബജറ്റിലെ പ്രഖ്യാപനത്തെ പരിഹസിച്ച് സിപിഎമ്മിന്റെ രാജ്യസഭാ എംപി ഡോ.വി.ശിവദാസന്. ആവാസ് യോജനയിലെ തുക 80 ലക്ഷം കക്കൂസിന് പോലും തികയില്ലെന്ന് വി.ശിവദാസന് പരിഹസിച്ചു. ഇത്രയും വീടുകള് നിര്മ്മിക്കാനായി അനുവദിച്ച തുകയെ എണ്പതുലക്ഷം വീടുകള്ക്കായി വീതിച്ചാല് ഒരു വീടിന് അറുപതിനായിരം രൂപമാത്രമാണുണ്ടാകുക എന്ന് എംപി ചൂണ്ടിക്കാട്ടുന്നു.
വി.ശിവദാസന് എംപിയുടെ പ്രതികരണം: ”ആവാസ് യോജനയിലെ തുക 80 ലക്ഷം കക്കൂസിന് പോലും തികയില്ല. പ്രധാനമന്ത്രി ആവാസ് യോജനയാണ് ബജറ്റില് സാധാരണക്കാര്ക്കായി കൊട്ടിഘോഷിച്ച് അവതരിപ്പിച്ച പദ്ധതി. എണ്പത് ലക്ഷം ആളുകള്ക്ക് വീട് നിര്മ്മിച്ചു കൊടുക്കുമെന്നാണ് പറഞ്ഞിരിക്കുന്നത്. വായ്ത്താരികള് കൊണ്ട് വീടു നിര്മ്മിക്കാനാകില്ലെന്ന് എല്ലാവര്ക്കും അറിയാവുന്നതാണ്. അതിന് മണലും സിമന്റും കല്ലുമെല്ലാം ആവശ്യമാണ്. കൂടാതെ മനുഷ്യാദ്ധ്വാനവും വേണം. അതിനെല്ലാമായി എത്ര രൂപയാണ് ബജറ്റില് നീക്കി വച്ചിരിക്കുന്നതെന്നത് നോക്കുക. പ്രഖ്യാപനത്തില് കാണുന്നത് വിശ്വാസത്തിലെടുത്താല് തന്നെ 48,000 കോടി രൂപ മാത്രമാണ്. ആ തുകയെന്തിനു തികയുമെന്നത് നോക്കുക.
പ്രൊജക്ട് അഡ്മിനിസ്ട്രേഷന് തുകയൊന്നും ചെലവഴിക്കേണ്ടി വരില്ലെന്ന് കൂട്ടിയാല് തന്നെ ഈതുക എണ്പതുലക്ഷം കക്കൂസുണ്ടാക്കാന് പോലും തികയില്ല. ഇത്രയും വീടുകള് നിര്മ്മിക്കാനായി അനുവദിച്ച തുകയെ എണ്പതു ലക്ഷം വീടുകള്ക്കായി വീതിച്ചാല് ഒരു വീടിന് അറുപതിനായിരം രൂപ മാത്രമാണുണ്ടാകുക. ഈ തുക കൊണ്ട് രാജ്യത്ത് സാധാരണക്കാര് വീടുണ്ടാക്കണമെന്നാണ് കേന്ദ്രസര്ക്കാര് പറയുന്നത്. ഈ തുക കൊണ്ട് കക്കൂസുണ്ടാക്കാന് തികയുമോയെന്നതാണ് പരിശോധിക്കേണ്ടത്. അതിലൂടെ ആവാസ് യോജന പദ്ധതിയിലൂടെ എണ്പത് ലക്ഷം വീടുകള് ഉണ്ടാകാന് പോകുന്നില്ലെന്ന് ഉറപ്പിക്കാനാകും.
