ഡൽഹി: രാമക്ഷേത്ര ഭണ്ഡാരക്കൊള്ളയിൽ ചമ്പത് റായിയെ എസ്ഐടി വീണ്ടും ചോദ്യം ചെയ്യും. ട്രസ്റ്റിലേക്കുള്ള വരുമാനത്തെക്കുറിച്ചും കൊള്ളയിൽ അറസ്റ്റിലായവരെയും കുറിച്ചും കൂടുതൽ വിവരങ്ങൾ തേടുകയാണ് ലക്ഷ്യം. ചമ്പത് റായ് ഉൾപ്പെടെയുള്ളവർക്കെതിരെ കേസെടുക്കണമെന്ന് ആവശ്യപ്പെട്ട് അഭിഭാഷക സംഘടന രംഗത്ത് എത്തിയതിന് പിന്നാലെയാണ് നീക്കം. ചമ്പത് റായ്,അനിൽ മിശ്ര, ഗോപാൽ റാവു എന്നിവർക്കെതിരെ പൊലീസ് ഇതുവരെ എഫ്ഐആർ രജിസ്റ്റർ ചെയ്തിട്ടില്ല, ഇതിനെതിരെ വലിയ പ്രതിഷേധവും വിമർശനവും ശക്തമായതോടെയാണ് ചമ്പത് റായ്യേ വീണ്ടും ചോദ്യം ചെയ്യാൻ എസ്ഐടി ഒരുങ്ങുന്നത്. ഇത്തവണ വിശദമായി ചോദ്യം ചെയ്യാനാണ് തീരുമാനം.
വ്യാജവും കെട്ടിച്ചമച്ചതുമായ വിശദീകരണങ്ങളിലൂടെ സത്യം മറച്ചുവെക്കാൻ ശ്രമിക്കുകയാണെനാണ് ഫൈസാബാദ് ബാർ അസോസിയേഷന്റെ പരാതിയിൽ പറയുന്നത്. രാമക്ഷേത്രത്തിലെ കാണിക്ക മോഷണക്കേസിൽ പ്രതികൾക്ക് വേണ്ടി ഒരു അഭിഭാഷകനും ഹാജരാകരുതെന്ന് അയോധ്യ ബാർ അസോസിയേഷൻ നേരത്തെ തീരുമാനിച്ചിരുന്നു.
