ആലപ്പുഴ : അയോധ്യ രാമേക്ഷേത്ര നിര്മാണത്തിന്റെ ധനസമാഹരണം ഉദ്ഘാടനം ചെയ്ത് ആലപ്പുഴ ഡി.സി.സി വൈസ് പ്രസിഡന്റ് ടി.ജി. രഘുനാഥ പിള്ള കോണ്ഗ്രസ് പാര്ട്ടിയെ പ്രതിരോധത്തിലാക്കി. പാര്ട്ടി പ്രവര്ത്തകര് ശക്തമായ പ്രതിഷേധവുമായി രംഗത്തെത്തി. സമൂഹമാധ്യമങ്ങളിലും പ്രതിഷേധം ഉയരുകയാണ്.
എന്നാല് ക്ഷേത്ര ഭാരവാഹി എന്ന നിലയിലാണ് താന് പരിപാടി ഉദ്ഘാടനം ചെയ്തതെന്നാണ് ഇദ്ദേഹത്തിന്റെ വിശദീകരണം. പള്ളിപ്പുറം പട്ടാര്യസമാജം പ്രസിഡന്റാണ് ഇദ്ദേഹം. രാമക്ഷേത്ര നിര്മ്മാണവുമായി ബന്ധപ്പെട്ട് കൂപ്പണ് വിതരണം നടത്തുന്നുണ്ടായിരുന്നു. ക്ഷേത്രത്തിന്റെ മേല്ശാന്തിയാണ് ഇതിന്റെ ഉദ്ഘാടനം നടത്തണമെന്ന് ആവശ്യപ്പെട്ടതെന്നും രഘുനാഥപിള്ള പറയുന്നു. രാമക്ഷേത്രവുമായി ബന്ധപ്പെട്ട പ്രശ്നങ്ങളെല്ലാം തീര്ന്ന് നിലവില് യാതൊരു പ്രശ്നവുമില്ല. ബാബരി മസ്ജിദിന്റെ നിര്മ്മാണവും രാമക്ഷേത്ര നിര്മ്മാണവും നടക്കുന്നുണ്ട്. നിലവില് എന്താണ് പ്രശ്നമെന്ന് മനസിലാകുന്നില്ലെന്നും അദ്ദേഹം പ്രതികരിച്ചു. ദേശീയ നേതാക്കള് ഈ വിഷയങ്ങളെല്ലാം അംഗീകരിച്ചിരുന്നുവെന്നും ഒരു ആരാധനാലയത്തിന്റെ നിര്മ്മാണ ഫണ്ട് പിരിവ് ഉദ്ഘാടനം നടത്തുകയാണ് ചെയ്തതെന്നും അദ്ദേഹം മാധ്യമങ്ങളോട് പ്രതികരിച്ചു.
കടവില് ശ്രീ മഹാലക്ഷ്മി ക്ഷേത്ര മേല്ശാന്തിക്ക് കൂപ്പണ് നല്കി രണ്ടു ദിവസം മുമ്പായിരുന്നു ഉദ്ഘാടനം. ഇതിന്റെ ചിത്രങ്ങള് ഫേസ്ബുക്കില് പോസ്റ്റ് ചെയ്തിരുന്നു. തുടര്ന്ന് കോണ്ഗ്രസ് നേതാക്കള് ഉള്പ്പെടെ ഇതിനെതിരെ പ്രതിഷേധവുമായി രംഗത്തെത്തുകയായിരുന്നു.
