റാന്നി: റാന്നിയിൽ നടക്കുന്ന ശ്രീമദ് അയ്യപ്പ മഹാ സത്രത്തിൽ അമൃതാനന്ദ മയി മഠം ജനറൽ സെക്രട്ടറി സ്വാമി പൂർണാമൃതാനന്ദ പുരി പങ്കെടുക്കും. ഡിസംബർ 16 വൈകിട്ട് 5 .30 ന് എത്തുന്ന സന്യാസിയെ സംഘാടകർ പൂർണകുംഭം നൽകി സ്വീകരിക്കും. തുടർന്ന് 6.30 ന് അനുഗ്രഹ പ്രഭാഷണം ആരംഭിക്കും. പൂർണാമൃതാനന്ദ പുരിയുടെ നേതൃത്വത്തിൽ ഭക്തി ഗാനാർച്ചനയും ആരതിയും നടക്കും. സത്ര വേദിയിൽ ഏറെ നേരം പൂർണാമൃതാനന്ദ പുരി ചിലവഴിക്കും.
ഇന്ന് നടന്ന നാരായണീയ യജ്ഞത്തിൽ എഴുത്തു കാരനും പ്രഭാഷകനും ഭക്തി ഗാന രചയിതാവുമായ ഡോ. സുരേഷ് റാന്നി പങ്കെടുത്തു. ധർമ സംരക്ഷണം അമ്മമാരിലൂടെ മാത്രമേ സമ്പൂർണമാക്കാൻ കഴിയൂ എന്നദ്ദേഹം പറഞ്ഞു. ഈശ്വരൻ ഉള്ളിൽ വസിക്കുന്നുവെന്നാണ് ഹൈന്ദവ ധർമം പഠിപ്പിക്കുന്നത്. ഉള്ളിൽ ഈശ്വരൻ വസിക്കുന്നുവെങ്കിൽ ഉള്ളിലേക്ക് മാലിന്യം നിക്ഷേപിക്കുന്നത് പാപമാണെന്ന വിശ്വാസം അമ്മമാരാണ് സമൂഹത്തിലേക്ക് പകരേണ്ടതെന്നും അദ്ദേഹം പറഞ്ഞു.
അന്നദാനം 24 ദിവസം പൂർത്തിയാക്കി. അന്നദാന യഞ്ജത്തിലും നാരായണീയ യഞ്ജത്തിലും സ്വാമി പവനപുത്ര ദാസ്, മഹാ സത്രം ജനറൽ കൺവീനർ എസ് അജിത് കുമാർ നെടുംപ്രയാർ, പ്രസിഡണ്ട് പ്രസാദ് കുഴികാല, പ്രോഗ്രാം കമ്മിറ്റി ചെയർമാൻ ഗോപൻ ചെന്നിത്തല, രാധാകൃഷ്ണൻ പെരുമ്പെട്ടി, മോഹന ചന്ദ്രൻ കാട്ടൂർ, വിജയ ലക്ഷ്മി, സുമതി ദാമോദരൻ തുടങ്ങിയവർ പങ്കെടുത്തു.
ഗുരുവായൂർ ശ്രീകൃഷ്ണ സ്വാമി ക്ഷേത്രത്തിൽ നിന്നാരംഭിച്ച സത്രവേദയിൽ പ്രതിഷ്ഠിക്കുന്നതിനുള്ള വിഗ്രഹ ഘോഷയാത്ര ഇന്ന് ദക്ഷിണ കാശി ചോലമറ്റം ശ്രീകൃഷ്ണ സ്വാമി ദേവസ്വം ട്രസ്റ്റിൽ നിന്നാരംഭിച്ചു. പെരുമ്പാവൂർ ശ്രീ ധർമ ശാസ്താ ക്ഷേത്രം, തിരുവൈരാണിക്കുളം മഹാദേവ ക്ഷേത്രം, ശ്രീ ദത്ത ആഞ്ജനേയ ക്ഷേത്രം ദേശം തുടങ്ങിയ ക്ഷേത്രങ്ങൾ സന്ദർശിച്ച് ആലുവ മഹാദേവ ക്ഷേത്രത്തിൽ വിശ്രമിച്ചു. ആലങ്ങാട്ടു പേട്ട സംഘം പെരിയോൻ എ കെ വിജയകുമാറിന്റെ നേതൃത്വത്തിൽ നടക്കുന്ന ഘോഷയാത്രയെ ചെയർമാൻ രാജേഷ് കുറുപ്പ്, കൺവീനർ ഗിരീഷ് കെ നായർ എന്നിവർ അനുഗമിക്കുന്നുണ്ട്.
