കൊല്ലം : ആലപ്പുഴ കൊലപാതകങ്ങളുടെ പശ്ചാത്തലത്തില് ബൈപാസ് റോഡില് കിളികൊല്ലൂര് പോലീസ് നടത്തിയ വാഹന പരിശോധനയില് ഒന്നരക്കോടിയോളം രൂപ വിലവരുന്ന രണ്ടേകാല് ലക്ഷത്തോളം പായ്ക്കറ്റ് നിരോധിത പുകയില ഉല്പന്നങ്ങള് പിടികൂടി. രണ്ട് ലോറികളിലായി കൊണ്ടുവരികയായിരുന്ന 90 ചാക്ക് നിരോധിത പുകയില ഉല്പന്നങ്ങളാണ് പിടികൂടിയത്. ഒരു ലോറി പോലീസ് പിടികൂടുന്നതു കണ്ട് പിന്നാലെ വരികയായിരുന്ന ലോറി ഉപേക്ഷിച്ച് ഡ്രൈവര് രക്ഷപ്പെട്ടു. ഒരു ഡ്രൈവര് അറസ്റ്റിലായി. തൃശൂര് വേലൂപ്പാടം വരന്തരപ്പള്ളി കണ്ണൂര് കാടന് പ്രമോദ് (37) ആണ് സംഭവവുമായി ബന്ധപ്പെട്ട് അറസ്റ്റിലായത്.
ചാലക്കുടിയില് നിന്ന് തിരുവനന്തപുരം ഭാഗത്തേക്ക് കൊണ്ടു പോകുകയായിരുന്നു പുകയില ഉല്പന്നങ്ങള്. ഡി.ജി.പിയുടെ കാവല്, റേഞ്ച് ഡി.ഐ.ജിയുടെ ഓപറേഷന് ട്രോജന് എന്നീ പദ്ധതികളുടെ ഭാഗമായി സിറ്റി പോലീസ് കമ്മീഷണര് ടി. നാരായണന്റെ നിര്ദേശപ്രകാരം കൊല്ലം എ.സി.പി ജി.ഡി. വിജയകുമാറിന്റെയും കിളികൊല്ലൂര് ഐ.എസ്.എച്ച്.ഒ കെ. വിനോദിന്റെയും നേതൃത്വത്തില് പോലീസ് സംഘം രാത്രിയിലാണ് ബൈപാസ് റോഡില് കല്ലും താഴം ഭാഗത്ത് പരിശോധന നടത്തിയത്.
