ന്യൂഡല്ഹി : ഇനി എ.ടി.എമ്മില് പണമില്ലെങ്കില് ബാങ്കുകള്ക്ക് പിഴ ചുമത്തും. പൊതുജനത്തിന് ആവശ്യത്തിന് പണം എ.ടി.എമ്മുകളിലൂടെ ലഭ്യമാകുന്നത് ഉറപ്പുവരുത്തുന്നതിന് വേണ്ടിയാണ് പിഴ ഈടാക്കാനുളള തീരുമാനമെടുത്തതെന്ന് ആര്.ബി.ഐ പുറത്തിറക്കിയ സര്ക്കുലറില് പറയുന്നു. ഒക്ടോബര് ഒന്നുമുതല് പിഴ ഈടാക്കുന്നത് നിലവില് വരും. മാസത്തില് പത്തുമണിക്കൂറില് കൂടുതല് സമയം എ.ടി.എം കാലിയായാല് ആണ് പതിനായിരം രൂപ പിഴ ഈടാക്കുക.
യഥാസമയം പണം നിറയ്ക്കാത്തതിനെ തുടര്ന്ന് പ്രവര്ത്തന രഹിതമായി കിടക്കുന്ന എ.ടി.എമ്മുകളെ കുറിച്ച് അവലോകനം നടത്തിയെന്നും ഇത് പൊതുജനങ്ങള്ക്ക് അസൗകര്യമുണ്ടാക്കുന്നുണ്ടെന്നുമുളള വിലയിരുത്തലിലാണ് ആര്.ബി.ഐ യുടെ ഈ നടപടി. ബാങ്കുകള്, എ.ടി.എം ഓപ്പറേറ്റര്മാര് എന്നിവര് എ.ടി.എമ്മുകളില് പണത്തിന്റെ ലഭ്യത നിരീക്ഷിക്കുകയും ലഭ്യത ഉറപ്പുവരുത്തുകയും ചെയ്യുന്നതിനായി തങ്ങളുടെ സംവിധാനങ്ങള് ശക്തിപ്പെടുത്തണമെന്ന് ആര്.ബി.ഐ പറയുന്നു. ഇതുമായി ബന്ധപ്പെട്ട ലംഘനങ്ങളെ ഗൗരവത്തോടെ സമീപിക്കുമെന്നും, പിഴ ഈടാക്കുമെന്നും ആര്.ബി.ഐ വ്യക്തമാക്കി.