പാലക്കാട്: വേനല് കടുത്തതോടെ ഭാരതപ്പുഴയിലെ കുടിവെള്ള പദ്ധതികള് അവതാളത്തില്. ജലക്ഷാമം കണക്കിലെടുത്ത് മലമ്പുഴ ഡാം തുറക്കാന് നടപടി.
കേരളാ വാട്ടര് അതോറിറ്റിയുടെ പമ്പ് ഹൗസുകള്ക്ക് വെള്ളം പമ്പ് ചെയ്യുന്നതിനായി ഡാം തുറക്കാന് നടപടി സ്വീകരിക്കണമെന്നു ആവശ്യപ്പെട്ട് യു.ആര്. പ്രദീപ് എം.എല്.എ. മുഖ്യമന്ത്രി പിണറായി വിജയന് കത്തു നല്കിയിരുന്നു. ഈ കത്തില് ആവശ്യമായ നടപടി സ്വീകരിക്കാന് ജല വിഭവ വകുപ്പു അഡിഷണല് ചീഫ് സെക്രട്ടറിയോട് മുഖ്യമന്ത്രി നിര്ദ്ദേശിച്ചു. ഇതിന്റെ അടിസ്ഥാനത്തിലാണ് മലമ്പുഴ ഡാം എക്സിക്യൂട്ടീവ് എന്ജിനീയര് ആവശ്യമായ നടപടി സ്വീകരിച്ചത്.
ചേലക്കര നിയോജകമണ്ഡലത്തിലെ വാട്ടര് അതോറിറ്റിയുടെ പൈങ്കുളം, തൊഴുപാടം എന്നി പമ്പ് ഹൗസുകള്ക്ക് വെള്ളം പമ്പ് ചെയ്യുന്നതിനു ഭാരതപ്പുഴയില് ആവശ്യമായ നീരൊഴുക്കും ജല ലഭ്യതയും ഇല്ല. അതിനാല് മണ്ഡലത്തിലെ ഒമ്പതു പഞ്ചായത്തുകളിലെ ആയിരകണക്കിന് കുടുംബങ്ങള് ശുദ്ധജല ക്ഷാമം നേരിടുന്നുണ്ട്. ഏപ്രില്, മേയ് മാസങ്ങളില് കുടിവെള്ള പദ്ധതികളുടെ പമ്പ് ഹൗസുകള് പ്രവര്ത്തിക്കുന്നതിന് ആവശ്യമായ ജലലഭ്യത ഉറപ്പുവരുത്തുന്നതിന് ഇടവിട്ടാണ് മലമ്പുഴ ഡാം തുറക്കുക.
