ഇടുക്കി : ബാര്ബര് ബ്യൂട്ടീഷന് അസോസിയേഷനെ ചൊടിപ്പിച്ച വിവാദ പരാമര്ശത്തില് ഉറച്ച് ഇടുക്കി ഡി.സി.സി പ്രസിഡന്റ് സി.പി മാത്യു. ഒരു വിഭാഗത്തെയും വ്രണപ്പെടുത്തുന്നത് തന്റെ സംസ്കാരമല്ല. പറഞ്ഞതില് തെറ്റില്ലാത്തതിനാല് പിന്വലിക്കുകയോ മാപ്പ് പറച്ചിലോ ഇല്ലെന്നാണ് സി.പി മാത്യുവിന്റെ പക്ഷം.
‘മണ്മറഞ്ഞുപോയ രക്തസാക്ഷിയെ ഈ മണ്ണില് പോലും കിടക്കാന് അനുവദിക്കില്ലെങ്കില് ഞങ്ങള് ചെരക്കാനല്ല നടക്കുന്നതെന്ന് സി.പി.എം ഓര്ക്കണം’ എന്നായിരുന്നു മാത്യുവിന്റെ വാക്കുകള്. താന് ഉദ്ദേശിച്ചത് ബാര്ബര്മാരെയല്ല. തെറ്റിദ്ധരിച്ചവര് സ്വയം തിരുത്തണമെന്നാണ് മാത്യുവിന്റെ വാദം. നാടന് ശൈലിയിലുള്ള വാക്കുകള് മാത്രമായിരുന്നു അത്. പരാമര്ശം പിന്വലിച്ച് മാപ്പ് പറഞ്ഞില്ലെങ്കില് ഇടുക്കിയില് ഒരു ബാര്ബറും മാത്യുവിന്റെ മുടിവെട്ടില്ലെന്നായിരുന്നു ബാര്ബര് ബ്യൂട്ടീഷന് അസോസിയേഷന്റെ നിലപാട്. വിഷയത്തില് കെ.എസ്.ബി.എയും പിന്നോട്ടില്ല. കൂടുതല് പ്രതിഷേധത്തിലേക്ക് നീങ്ങുകയാണ് സംഘടന.
