ആറ്റിങ്ങല്‍ : ബ്യൂട്ടി പാര്‍ലറിനുള്ളില്‍ അഞ്ചു ജീവനക്കാര്‍ വിഷവാതകം ഉള്ളില്‍ ചെന്നതിനെ തുടര്‍ന്ന് കുഴഞ്ഞുവീണു. ആറ്റിങ്ങല്‍ മാമം അഷ്ടമുടി ബ്യൂട്ടി പാര്‍ലറിലായിരുന്നു സംഭവം.
വെസ്റ്റ് ബംഗാള്‍ സ്വദേശി സുസ്മിത മണ്ഡ‌ല്‍ (27), സിക്കിം സ്വദേശികളായ സൗമ്യ (25), ഗ്രേസി (24), ഡാര്‍ജലിങ് സ്വദേശി സഞ്ജു (25), ആറ്റിങ്ങല്‍ സ്വദേശി മിനി (45) എന്നിവരാണ് ജോലിക്കിടെ കുഴഞ്ഞുവീണത്. അടച്ചിട്ട പാര്‍ലറില്‍ രാവിലെമുതല്‍ എ.സി പ്രവര്‍ത്തിക്കുന്നുണ്ടായിരുന്നു. ഇതിന്റെ ജനറേറ്ററില്‍നിന്നുള്ള വിഷപ്പുകയാകാം അപകടകാരണമെന്ന് കരുതപ്പെടുന്നു.
ബ്യൂട്ടി പാര്‍ലറിനുള്ളില്‍ നിലവിളിയും ബഹളവും കേട്ട് സമീപത്തുണ്ടായിരുന്നവര്‍ ഓടിയെത്തി അവശനിലയിലായ ജീവനക്കാരെ വലിയകുന്ന് താലൂക്കാശുപത്രിയില്‍ എത്തിച്ചു. ഓക്സിജന്‍ നല്‍കിയാണ് ഇവരുടെ ജീവന്‍ രക്ഷിച്ചതെന്ന് ആശുപത്രി അധികൃതര്‍ പറഞ്ഞു. ജീവനക്കാര്‍ അപകടനില തരണം ചെയ്തു.
