പത്തനംതിട്ട : പന്തളം തെക്കേക്കര ഗ്രാമ പഞ്ചായത്തിൽ പകർച്ച വ്യാധി പ്രതിരോധ പ്രവർത്തനങ്ങൾക്കും ശുചീകരണ നടപടികൾക്കും ആരംഭം കുറിച്ചു. പഞ്ചായത്ത് തല യോഗ തീരുമാനപ്രകാരം വാർഡുകളിലെ കമ്മിറ്റികൾ പൂർത്തീകരിച്ച് അൻപത് വീടിന് ഒരു സന്നദ്ധപ്രവർത്തക എന്ന നിലയിൽ ആരോഗ്യ വോളണ്ടിയർമാരെ തെരഞ്ഞെടുത്ത് പരിശീലനം നൽകി ഭവന സന്ദർശന പരിപാടികൾക്ക് തുടക്കമായി.
മെയ് 14 ,15 തീയതികളിൽ സ്പെഷ്യൽ ഡ്രൈവും 16ന് പഞ്ചായത്ത് തല ഉദ്ഘാടനവും 17-ന് സമ്പൂർണ്ണ ഉറവിട നശീകരണ പ്രവർത്തനങ്ങളും പതിനെട്ടിന് പൊതുസ്ഥല ശുചീകരണ പ്രവർത്തനങ്ങളും നടക്കും. സ്പെഷ്യൽ ഡ്രൈവിന്റെ ഉദ്ഘാടനം ഗ്രാമപഞ്ചായത്ത് പ്രസിഡന്റ് രാജേന്ദ്രപ്രസാദ് നിർവഹിച്ചു. ആരോഗ്യ വിദ്യാഭ്യാസ സ്ഥിരം സമിതി ചെയർമാൻ ശ്രീകുമാർ വികസനകാര്യ സ്ഥിരം സമിതി ചെയർമാൻ വിദ്യാധര പണിക്കർ ഹെൽത്ത് ഇൻസ്പെക്ടർ ജയരാജ് എന്നിവർ നേതൃത്വം നൽകി.