മൂവാറ്റുപുഴ : നഗരത്തിൽ ഇരുചക്രവാഹനങ്ങൾ മോഷ്ടിക്കുന്ന സംഘത്തിലെ പ്രധാനി പോലീസ് പിടിയിലായി. തൃശ്ശൂർ സ്വദേശിയായ മുഹമ്മദ് ഫസൽ (20) എന്ന യുവാവിനെയാണ് മൂവാറ്റുപുഴ പോലീസ് അറസ്റ്റ് ചെയ്തത്. കഴിഞ്ഞ മാസം 28-ാം തീയതി മൂവാറ്റുപുഴയിലെ ഒരു കാർ ഷോറൂമിന് മുന്നിൽ നിർത്തിയിട്ടിരുന്ന ബുള്ളറ്റ് മോഷ്ടിച്ച കേസിലാണ് ഇയാൾ പിടിയിലായിരിക്കുന്നത്. മോഷണത്തിന്റെ സിസിടിവി ദൃശ്യങ്ങൾ പോലീസിന് ലഭിച്ചിരുന്നു. നമ്പർ പ്ലേറ്റ് മാറ്റിയ നിലയിൽ വാഹനം ഓടിച്ചു വരുന്നത് പോലീസിന്റെ ശ്രദ്ധയിൽപ്പെട്ടതാണ് പ്രതിയെ കുടുക്കാൻ സഹായിച്ചത്.
പോലീസ് നടത്തിയ പരിശോധനയിൽ ഇയാൾ പിടിയിലാവുകയായിരുന്നു. മുഹമ്മദ് ഫസലിന്റെ പേരിൽ വിവിധ സ്റ്റേഷനുകളിലായി നിരവധി ബൈക്ക് മോഷണക്കേസുകൾ നിലവിലുണ്ടെന്ന് പോലീസ് അറിയിച്ചു. മോഷണസമയത്ത് ഇയാളോടൊപ്പമുണ്ടായിരുന്ന സഹായിയെ കണ്ടെത്താനായി പോലീസ് അന്വേഷണം ഊർജ്ജിതമാക്കിയിട്ടുണ്ട്.
