ബംഗളുരു : കള്ളപ്പണം വെളുപ്പിച്ച കേസില് ജാമ്യം ലഭിച്ച ബിനീഷ് കോടിയേരി ബംഗളൂരു ജയിലില് നിന്നു പുറത്തിറങ്ങി. സത്യം ജയിക്കുമെന്ന് ജയിലില് നിന്ന് പുറത്തിറങ്ങിയ ബിനീഷ് പറഞ്ഞു. ഇന്ത്യയിലെ വലിയ രാഷ്ട്രീയപാര്ട്ടിയാണ് കേസിന് പിന്നില്. ഇഡി പറഞ്ഞ പേരുകള് പറയാന് തയാറാകാതിരുന്നതുമൂലമാണ് ജയില്വാസം നീണ്ടത്. കോടിയേരി ബാലകൃഷ്ണനെതിരായ രാഷ്ട്രീയ നീക്കമായിരുന്നു കേസ്.
കേരളത്തിലെത്തിയ ശേഷം വിശദമായി പറയുമെന്നും ബിനീഷ് കോടിയേരി മാധ്യമങ്ങളോട് പറഞ്ഞു. കടുത്ത ജാമ്യ വ്യവസ്ഥകള് കാരണം ജാമ്യക്കാര് പിന്മാറിയതിനാല് ഇന്നലെ ബിനീഷിനു പുറത്തിറങ്ങാന് കഴിഞ്ഞിരുന്നില്ല. ബിനീഷിനു ജാമ്യം നല്കിയതിനെതിരെ ഇഡി സുപ്രീംകോടതിയെ സമീപിക്കുമെന്നാണ് സൂചന. കള്ളപ്പണം വെളുപ്പിക്കല് നിരോധന നിയമപ്രകാരം 2020 ഒക്ടോബര് 29നാണ് ബിനീഷ് കോടിയേരിയെ എന്ഫോഴ്സ്മെന്റ് ഡയറക്ടറേറ്റ് അറസ്റ്റ് ചെയ്തത്. ബിനീഷ് അറസ്റ്റിലായി വെള്ളിയാഴ്ച ഒരു വര്ഷം തികയുന്നതിന്റെ തൊട്ടുതലേ ദിവസമാണ് ജാമ്യം ലഭിക്കുന്നത്.
