കുണ്ടറ: ബിജെപി പ്രവര്ത്തകനായ വിമുക്ത ഭടനെ വീടിനുള്ളില് തൂങ്ങി മരിച്ച നിലയില് കണ്ടെത്തി. പെരിനാട് ചെറുമൂട് മാര്ക്കറ്റിന് വടക്ക് കണ്ണമ്ബലത്ത് വീട്ടില് ജി.ഉദയകുമാര് (49) ആണു മരിച്ചത്. സിപിഎം നേതാവിന്റെ വീടിനു മുന്നില് പടക്കം പൊട്ടിച്ച കേസില് അറസ്റ്റിലാകുമെന്നു ഭയന്ന് ആത്മഹത്യ ചെയ്തതാണെന്ന് ആരോപണം.
തദ്ദേശ സ്വയംഭരണ തിരഞ്ഞെടുപ്പില് പെരിനാട് ഗ്രാമപ്പഞ്ചായത്തിലെ 19 ാം വാര്ഡില് ബിജെപി സ്ഥാനാര്ഥിയാണു വിജയിച്ചത്. ഫലപ്രഖ്യാപന ദിവസം വൈകിട്ട് ബിജെപി നടത്തിയ ആഹ്ലാദപ്രകടനത്തിനിടെ സിപിഎം നേതാവിന്റെ വീടിനു മുന്നില് പടക്കം പൊട്ടിച്ചു.
ഇതില് ക്ഷുഭിതനായ സിപിഎം നേതാവ് പൊലീസില് പരാതി നല്കി. പൊലീസ് ഉദയകുമാറടക്കമുള്ള നാലു പേരെ പ്രതികളാക്കി കേസെടുത്തു. കേസില് നാലു പേരും കോടതിയില് ജാമ്യാപേക്ഷ നല്കി. എന്നാല് കോടതി ജാമ്യം ലഭിച്ചവരുടെ പട്ടികയില് ഉദയകുമാറിന്റെ പേര് തെറ്റായാണു വന്നത്. ഇതു മൂലം പൊലീസ് ജാമ്യം നിഷേധിച്ചു. ഇതെ തുടര്ന്ന് കഴിഞ്ഞദിവസങ്ങളില് ഇദ്ദേഹം നിരാശനായിരുന്നു. ഇതാകാം ആത്മഹത്യയിലേക്ക് നയിച്ചത് എന്നാണ് പ്രാഥമിക നിഗമനം