തിരുവനന്തപുരം: സന്ദീപാനന്ദഗിരിയുടെ ആശ്രമം കത്തിച്ച കേസില് ബിജെപി കൗണ്സിലര് ഗിരികുമാറിന് ജാമ്യം. മൂന്നാം പ്രതിയായ ശബരി എസ്. നായരുടെ ജാമ്യാപേക്ഷ കോടതി തള്ളി. ബിജെപിയുടെ തിരുവനന്തപുരം ജില്ലാ ജനറല് സെക്രട്ടറിയും നഗരസഭ സഭ കൗണ്സിലറുമാണ് ഗിരികുമാര്. ആശ്രമം കത്തിക്കാന് നിര്ദേശിച്ചത് ഗിരികുമാറാണെന്നും ആശ്രമം തീയിട്ട രണ്ടു പേരില് ഒരാള് ശബരിയാണെന്നുമാണ് അന്വേഷണസംഘത്തിന്റെ കണ്ടെത്തല്. ശബരിമലയിലെ യുവതി പ്രവേശന വിഷയത്തില് സന്ദീപാനന്ദഗിരി നടത്തിയ പരാമര്ശങ്ങളിലുള്ള അതൃപ്തിയെ തുടര്ന്നാണ് ആക്രമണം നടത്തിയതെന്നാണ് റിമാന്ഡ് റിപ്പോര്ട്ടില് പറയുന്നത്.
ബൈക്കിലെത്തി തീകൊളുത്തിയ സംഘത്തിലെ രണ്ടാമനാണ് പ്രതി ശബരി. ആശ്രമം കത്തിച്ച കേസിലെ ഒന്നാം പ്രതിയും ആര്എസ്എസ് പ്രവര്ത്തകനുമായിരുന്ന പ്രകാശിന്റെ സഹോദരന് പ്രശാന്തിന്റെ വെളിപ്പെടുത്തലാണ് കേസില് വഴിത്തിരിവായത്. ആശ്രമത്തിലേക്കെത്താന് ഇരുവരും ഉപയോഗിച്ച ബൈക്ക് പൊളിച്ച് വിറ്റുവെന്ന് കണ്ടെത്തിയെന്നും റിമാന്ഡ് റിപ്പോര്ട്ടിലുണ്ട്.
