പള്ളുരുത്തി : മഹിള മോര്‍ച്ച ജില്ല സെക്രട്ടറിയെ മര്‍ദിച്ച സംഭവത്തില്‍ പോലീസ് അറസ്റ്റിന് വിധേയനായ വ്യക്തിയെ ബി.ജെ.പിയുടെ മണ്ഡലം പ്രസിഡന്റായി തെരഞ്ഞെടുത്ത സംഭവത്തിൽ കൊച്ചിയില്‍ പാര്‍ട്ടിക്കുള്ളിലെ പ്രതിഷേധം ശക്തിപ്പെടുന്നു. ബി.ജെ.പി കൊച്ചി മണ്ഡലത്തിന്റെ പ്രസിഡന്റായി തെരഞ്ഞെടുക്കപ്പെട്ട ശിവദത്ത് പുളിക്കല്‍ ജില്ല മഹിള മോര്‍ച്ച ജനറല്‍ സെക്രട്ടറി ലേഖ നായിക്കിനെ ആറുമാസം മുമ്പ് മര്‍ദിച്ച സംഭവത്തിലാണ് അറസ്റ്റിലായത്.
മുണ്ടംവേലിയില്‍ സ്വന്തം പുരയിടത്തിന് ചുറ്റുമതില്‍ കെട്ടുന്നതിന് റിട്ട. അധ്യാപികയായ വീട്ടുടമയോട് രണ്ട് ലക്ഷം രൂപ കൈക്കൂലി ചോദിച്ചു എന്നതായിരുന്നു പുതിയ മണ്ഡലം പ്രസിഡന്റ് അടക്കമുള്ളവര്‍ക്കെതിരെ അന്ന് ഉയര്‍ന്ന ആരോപണം. അന്ന് ശിവദത്ത് മണ്ഡലം ട്രഷററായിരുന്നു. പാര്‍ട്ടിയിലെ ഗ്രൂപ്പിസമാണ് ഇത്തരം നേതാക്കള്‍ക്ക് അധ്യക്ഷ പദവി നല്‍കിയതിന് പിന്നില്ലെന്ന് ഒരു വിഭാഗം ആരോപിക്കുന്നു. സംസ്ഥാന പ്രസിഡന്റ് അടക്കമുള്ളവര്‍ക്ക് പരാതി നല്‍കാനുള്ള നീക്കത്തിലാണ് ഇവര്‍.
