ഇരിക്കൂര് : ഇരിക്കൂറില് നിന്ന് കണ്ണൂരിലേക്കുള്ള പ്രധാന പാതയില് റോഡ് പൊട്ടിപ്പൊളിഞ്ഞ് വലിയ കുഴികള് രൂപപ്പെട്ടതിനാല് അപകടം പതിവാകുന്നു. ഹെല്പ് ആശുപത്രിയുടെ സമീപമുള്ള റോഡാണ് പൊട്ടിപ്പൊളിഞ്ഞത്. ഈ റോഡിലൂടെ ദിനേന നൂറുകണക്കിന് വാഹനങ്ങളാണ് പോകുന്നത്. ഇരുചക്ര വാഹനങ്ങള് കുഴിയില് വീഴുന്നതും അപകടം പറ്റുന്നതും പതിവാണ്.
കുഴിയില് വീഴാതിരിക്കാന് വെട്ടിക്കുന്നതുമൂലം എതിര് ദിശയില് വരുന്ന വാഹനങ്ങളുമായി കൂട്ടിമുട്ടുന്നു. വലിയ ചരക്കു വാഹനങ്ങള് കടന്നുപോകുന്ന റോഡായതിനാല് എതിര് ദിശയില് നിന്നു വരുന്ന വാഹനങ്ങള്ക്ക് റോഡ് കാണാത്ത അവസ്ഥയുമുണ്ട്. കഴിഞ്ഞ ദിവസം ഒരു ബൈക്ക് യാത്രികന് കുഴിയില് വീണ് സാരമായ പരിക്കുപറ്റി.
മഴക്കാലമായതോടെ നിരവധി കുഴികളാണ് റോഡില് രൂപപ്പെട്ടിരിക്കുന്നത്. അധികൃതര് താല്ക്കാലിക സ്വഭാവത്തില് കുഴികള് അടക്കുന്നത് കൊണ്ടുതന്നെ രണ്ട് ദിവസത്തിനുള്ളില് കുഴികള് വീണ്ടും പ്രത്യക്ഷപ്പെടുകയാണ്. പൊതുമരാമത്ത് വകുപ്പിന്റെ പി.ഡബ്ല്യു.ഡി ആപ്പില് പരാതി രജിസ്റ്റര് ചെയ്തിട്ടും ഒരു നടപടിയും എടുത്തിട്ടില്ലെന്ന് നാട്ടുകാര് പരാതിപ്പെട്ടു.
സെപ്റ്റംബറില് രജിസ്റ്റര് ചെയ്ത പരാതിക്ക് ഇതുവരെ പരിഹാരം കണ്ടെത്താന് പൊതുമരാമത്ത് വകുപ്പ് തയാറായിട്ടില്ലെന്നും നാട്ടുകാര് ആരോപിച്ചു. ശാശ്വത പരിഹാരത്തിനായി ഇനിയും അധികാരികള് കണ്ണുതുറക്കുന്നില്ലെങ്കില് വലിയ അപകടങ്ങള്ക്ക് സാക്ഷ്യം വഹിക്കേണ്ടിവരുമെന്ന് നാട്ടുകാര് പരാതിപ്പെട്ടു.