ബംഗളൂരു : രാഹുല്‍ ഗാന്ധി നയിക്കുന്ന കോണ്‍ഗ്രസിന്‍റെ ഭാരത് ജോഡോ യാത്രക്ക് കിട്ടുന്ന സ്വീകാര്യതയില്‍ കര്‍ണാടകയിലെ ബി.ജെ.പി സര്‍ക്കാര്‍ വിയര്‍ക്കുന്നു. യാത്രക്ക് പരിഗണന നല്‍കേണ്ടതില്ലെന്ന ആദ്യ നിലപാടില്‍നിന്ന് മാറി പ്രതിരോധത്തിലേക്കാണ് നിലവില്‍ ബി.ജെ.പി നീങ്ങുന്നത്. യാത്ര ഒരു പ്രതിഫലനവും സൃഷ്ടിക്കുന്നില്ലെന്നാണ് പറയുന്നതെങ്കിലും മറുതന്ത്രങ്ങള്‍ ആവിഷ്കരിക്കുകയാണ് മറുഭാഗത്ത് ബി.ജെ.പി. കഴിഞ്ഞ ദിവസം ചേര്‍ന്ന പാര്‍ട്ടി സംസ്ഥാന എക്സിക്യൂട്ടിവ് യോഗത്തില്‍ ഇത് സംബന്ധിച്ച ചര്‍ച്ചകള്‍ നടന്നു.
ബി.ജെ.പിയും ആര്‍.എസ്.എസും വിഭാഗീയതയും വിദ്വേഷവും വളര്‍ത്തുകയാണെന്ന രാഹുലിന്‍റെ പ്രചാരണത്തിന് മറുപടിയായി എല്ലാവരെയും ഒന്നായി കാണുകയും തുല്യത നല്‍കുന്നതുമായ സര്‍ക്കാരാണ് തന്‍റേതെന്ന് മുഖ്യമന്ത്രി ബസവരാജ് ബൊമ്മൈക്ക് യോഗത്തില്‍ പറയേണ്ടിവന്നു.
