ലക്നൗ: ഉത്തര്പ്രദേശില് ബി ജെ പി നേതാവിനെ അക്രമികള് വെടിവെച്ചുകൊന്നു. ഇന്നു രാവിലെയായിരുന്നു സംഭവം. പാര്ട്ടി ബാഗ്പത് മുന് ജില്ലാ പ്രസിഡന്റ് സഞ്ജയ് ഖോഖറിനെയാണ് അജ്ഞാതരായ അക്രമികള് പ്രഭാത സവാരിക്കിടെ സ്വന്തം കൃഷിയിടത്തില്വെച്ച് വെടിവെച്ചുകൊന്നത്.
വെടിയൊച്ച കേട്ടെത്തിയ സമീപവാസികളാണ് വിവരം പോലീസിനെ അറിയിച്ചത്. പോലീസ് എത്തിയപ്പോഴേക്കും അദ്ദേഹം മരിച്ചിരുന്നു. മൂന്നുപേരാണ് ആക്രമണം നടത്തിയതെന്നാണ് പോലീസ് പറയുന്നത്. അക്രമികള്ക്കുവേണ്ടി തെരച്ചില് ആരംഭിച്ചു. ഇവരെ തിരിച്ചറിഞ്ഞിട്ടില്ല. സംഭവത്തെക്കുറിച്ച് അന്വേഷിച്ച് എത്രയും പെട്ടെന്ന് റിപ്പോര്ട്ട് നല്കാനും പ്രതികളെ ഉടന് അറസ്റ്റുചെയ്യാനും മുഖ്യമന്ത്രി യോഗി ആദിത്യനാഥ് ഉത്തരവിട്ടു.
ബാഗ്പതില് പാര്ട്ടി നേതാക്കള്ക്കും കുടുംബാംഗങ്ങള്ക്കും നേരെയുളള അക്രമങ്ങള് കൂടിവരികയാണ്. കഴിഞ്ഞ ജൂണില് മറ്റൊരു നേതാവിന്റെ മകനെ അക്രമികള് വെടിവെച്ചുകൊന്നിരുന്നു.
