തിരുവനന്തപുരം: മലപ്പുറത്തെ ആള്ക്കൂട്ട കൊലപാതകം ഞെട്ടിപ്പിക്കുന്നതെന്ന് ബിജെപി സംസ്ഥാന അധ്യക്ഷന് കെ സുരേന്ദ്രന്. ബിഹാര് സ്വദേശി രാജേഷ് മാഞ്ചി വാരിയെല്ലിനടക്കം പരിക്കേറ്റാണ് മരണത്തിന് കീഴടങ്ങിയതെന്നും വിഷയത്തില് അധികൃതരുടെ ഭാഗത്തുനിന്ന് ഒരു നടപടിയും ഉണ്ടായില്ലെന്നും സുരേന്ദ്രന് പറഞ്ഞു. കൊലപാതകം നടന്നത് മുസ്ലിംലീഗിന് സ്വാധീനമുള്ള സ്ഥലത്താണെന്നും പ്രതികളില് പലരും മുസ്ലിം ലീഗ് , പി എഫ് ഐ, സിപിഎം പ്രവര്ത്തകര് ആണെന്നും സുരേന്ദ്രന് ആരോപിച്ചു. ഭീകരതയുടെ യാഥാര്ത്ഥ്യം പുറത്തറിയാതിരിക്കാന് ബോധപൂര്വ്വം ശ്രമം നടക്കുന്നെന്ന് അദ്ദേഹം പറഞ്ഞു.
സംഭവത്തില് സിസിടിവി ദൃശ്യങ്ങള് നശിപ്പിക്കാന് ശ്രമമുണ്ടായി. പോലീസ് വീണ്ടെടുത്ത ദൃശ്യങ്ങള് മാധ്യമങ്ങള്ക്ക് നല്കാന് തയ്യാറായില്ല. ഈ ഭീകരതയുടെ യാഥാര്ത്ഥ്യം പുറത്തറിയാതിരിക്കാന് ബോധപൂര്വ്വം ശ്രമം നടക്കുന്നതായി അദ്ദേഹം ആരോപണം ഉയര്ത്തി. വടക്കോട്ട് നോക്കി സംസാരിക്കുന്ന മുഖ്യമന്ത്രിയും മന്ത്രിമാരും ഈ വിഷയത്തെക്കുറിച്ച് പ്രതികരിച്ചില്ല. കേരളത്തില് തുടര്ച്ചയായി ആള്ക്കൂട്ട കൊലപാതങ്ങള് ഉണ്ടാകുന്നു. ആഭ്യന്തര വകുപ്പ് പരാജയമാണെന്നും സുരേന്ദ്രന് കുറ്റപ്പെടുത്തി.
