ഡല്ഹി: ജനാധിപത്യത്തിന്റെ എല്ലാ അതിരുകളും കോണ്ഗ്രസ് നേതാവ് രാഹുല് ഗാന്ധി ലംഘിച്ചെന്ന് ബി.ജെ.പി അധ്യക്ഷന് ജെ.പി നദ്ദ. ജനാധിപത്യത്തില് വിശ്വസിക്കാത്തവര്ക്ക് ജനാധിപത്യത്തില് സ്ഥാനമില്ലെന്നും ജെ.പി നദ്ദ പറഞ്ഞു. ഭാരതീയ ജനതാ യുവമോര്ച്ചയുടെ നാഷണല് യൂത്ത് പാര്ലമെന്റ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. കോണ്ഗ്രസ് മാനസികമായി പാപ്പരായിരിക്കുന്നുവെന്ന് ജെ.പി നദ്ദ പറഞ്ഞു. രാഹുല് ഗാന്ധി രാജ്യത്തെ അപമാനിക്കുക മാത്രമല്ല, നമ്മുടെ രാജ്യത്ത് ഇടപെടാന് വിദേശ രാജ്യങ്ങളെ ക്ഷണിക്കുകയും ചെയ്തെന്ന് ജെ.പി നദ്ദ പറഞ്ഞു.
അതേസമയം രാഹുല് ഗാന്ധിക്കെതിരെ പ്രതികാര നടപടിയെന്നാണ് കോണ്ഗ്രസ് ആരോപിക്കുന്നത്. പാര്ലമെന്റിലെ രാഹുലിന്റെ ആരോപണങ്ങളോടുള്ള പ്രതികാരമാണ് ഡല്ഹി പോലീസിന്റെ നടപടിയെന്നാണ് ആരോപിക്കുന്നത്. ഭയപ്പെടുത്താനുള്ള രാഷ്ട്രീയ നീക്കമാണിതെന്നും കോണ്ഗ്രസ് ആരോപിക്കുന്നു. 10 ദിവസത്തിനുള്ളില് മറുപടി നല്കാം എന്ന് രാഹുല് ഗാന്ധി അറിയിച്ചതാണ്. ഇതിനിടയില് വീണ്ടും പോലീസ് വന്നത് വിവാദം സൃഷ്ട്ടിക്കാനാണെന്നും മനു അഭിഷേഖ് സിങ് വി പറഞ്ഞു. കഴിഞ്ഞ രണ്ടുദിവസത്തിനിടെ മൂന്ന് തവണയാണ് പോലീസ് രാഹുല് ഗാന്ധിയെ തേടിയെത്തിയത്.
