കൊച്ചി : വ്യാജ പുരാവസ്തു തട്ടിപ്പുമായി ബന്ധപ്പെട്ട കള്ളപ്പണം വെളുപ്പിക്കല് കേസില് ഉന്നത പോലീസ് അധികാരിക്കെതിരെ ഒന്നാം പ്രതി മോന്സന് മാവുങ്കല് നല്കിയ മൊഴികള് വസ്തുതാപരമാണെന്ന് എന്ഫോഴ്സ്മെന്റ് ഡയറക്ടറേറ്റിന്റെ (ഇഡി) പ്രാഥമിക നിഗമനം. ഒന്നര മാസം മുന്പാണു മോന്സന്റെ മൊഴി വിയ്യൂര് സെന്ട്രല് ജയിലിലെത്തി അന്വേഷണ സംഘം രേഖപ്പെടുത്തിയത്. അനിതാ പുല്ലയിലിനെയും അന്വേഷണ സംഘം ചോദ്യം ചെയ്യും. മോന്സനുമായി അടുപ്പം പുലര്ത്തിയിരുന്ന 3 പോലീസ് ഉദ്യോഗസ്ഥരാണു സംശയത്തിന്റെ നിഴലിലുള്ളത്. ഇതില് ഒരാളാണു വിരമിച്ചത്.
പുരാവസ്തു തട്ടിപ്പിനോടും നേരിട്ടു ബന്ധമുള്ള പോലീസ് ഉദ്യോഗസ്ഥന് മറ്റൊരാളാണെങ്കിലും വിരമിച്ച ഉദ്യോഗസ്ഥനുമായി സാമ്പത്തിക ഇടപാടുകള് മോന്സന് നടത്തിയിരുന്നു. പോലീസുകാരെ സംരക്ഷിക്കുന്ന മൊഴികളാണു മോന്സന് ഇഡിക്കു നല്കിയതെങ്കിലും തെളിവുകള് കാണിച്ചുള്ള ചോദ്യം ചെയ്യലില് സാമ്പത്തിക ഇടപാടുകളെക്കുറിച്ചു മോന്സന് വെളിപ്പെടുത്തിയതായാണ് അറിയുന്നത്. മോന്സന്റെ പ്രധാന സാമ്പത്തിക സ്രോതസ്സ് വില പെരുപ്പിച്ചു കാണിച്ച വ്യാജ പുരാവസ്തുക്കള് കാണിച്ചുള്ള ഫണ്ട് പിരിവാണ്.
